蘋果日報 | APPLE DAILY
› 選擇地區
三藩市
紐約
洛杉磯
其他美國地區
2003年04月05日

生命中第四個女友曝光
張國榮81年戀上DJ鄧慧詩

張國榮早年與鄧慧詩拍拖時,大方在街上手拖手,未因自己的知名度而有所避忌。

少女心事飄忽的戀愛不見終點
節錄張國榮《少女心事》

在張國榮一生至愛的唐鶴德出現前,大家一直以為他只愛過毛舜筠、倪詩蓓和楊諾思三個女人,但在張國榮的生命中,原來還有一個鮮為人知的女友,她就是港台DJ鄧慧詩。據知張國榮在八一年還未走紅時,曾跟香港電台第二台DJ鄧慧詩交往,可惜這段情只維繫了九個月便無疾而終。

相關新聞:Kelly、GiGi齊籲珍惜生命

鄧慧詩日前暫代患上肺炎的港台DJ錢佩卿,與倪秉郎一起主持電台節目時,無意中被倪秉郎在節目中踢爆她在八一年時曾與張國榮交往一事。

相識未紅時:
大家都啱啱起步,所以特別投契!
記者昨日致電鄧慧詩,向她求證與張國榮的一段情時,鄧慧詩直認不諱說:「八一年我喺電台做DJ仔,而Leslie當時重未算好紅。有次佢出席電台節目《青春交響曲》活動,由於當時有好多紅人出席,好似秋官鄭少秋同許冠傑咁,我見現場冇乜人理佢,於是咪走埋佢度,同佢傾吓偈囉,可能大家都係啱啱起步嗰個階段,所以特別投契,後尾大家交換埋電話,得閒約出嚟食飯行街睇戲,就係咁樣開始咗。」
鄧慧詩憶述當年張國榮十分體貼,二人拍拖初期,張國榮不時會到電台陪她做節目,或買飯盒到電台讓她醫肚,偶爾她又會陪對方到旺角的餐廳登台,當時張國榮每次登台的歌酬約數千元。

當眾手拖手:
林珊珊知道我同佢拍拖,好妒忌!
鄧慧詩說:「我當年做DJ,而佢係歌手,但我哋絕對冇利益衝突,因為我所做嘅節目係播外國歌手嘅歌。記得有啲好鍾意Leslie嘅女同事,好似林珊珊同何嘉麗咁,知道我同Leslie拍拖之後都好妒忌。但當年因為有電台高層提醒我,叫我哋拍拖要拍得低調啲,免得俾人講閒話,所以知道我哋拍過拖嘅人唔係咁多。」

戀愛大過天的張國榮當年已有一定知名度,但仍毫無避忌地與鄧慧詩行街睇戲,甚至當眾手拖手。鄧慧詩說:「我曾經問過佢,會唔會唔係咁方便,但佢乜都冇理會,呢樣嘢係我最欣賞佢嘅地方。不過,漸漸佢愈唱愈紅,每次出街,都有成班女仔走埋嚟圍住佢,又攬又錫,真係乜嘢年紀都有。我明白佢做藝人偶像要面對呢啲事情,但我作為女朋友,睇見咁嘅情況真係覺得好辛苦,尤其係佢愈紅愈多人鍾意,我就覺得我哋之間嘅距離愈大,又覺得自己配唔起佢。」

唔出席喪禮:
我係佛教徒,會幫佢做番啲嘢!
鄧慧詩指後來張國榮因工作忙碌,二人每次拍拖均要預早度期,漸漸感情轉淡,終於在和平氣氛下結束這段維持了九個月的感情。不過,縱使二人分手,但多年來再見亦是朋友,鄧慧詩透露數月前曾跟張國榮通電話,沒想到竟變成最後一次聊天。鄧慧詩說:「發生咁嘅事,當然好難過,好難相信,但我諗我唔係咁方便出席佢嘅喪禮。不過我係佛教徒,我會幫佢做番啲嘢嘅。」
採訪:戴彩煥
攝影:羅德光

相關新聞:毛舜筠:諗起標眼淚

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載