蘋果日報 | APPLE DAILY
› 選擇地區
三藩市
紐約
洛杉磯
其他美國地區
2003年05月08日

自爆性情率直惹東東反感
馮仁昭四圍超:葉安婷被嘲蒜頭鼻撼頭埋墻

葉安婷喺《美麗俏佳人》入面擔正做女主角。

曾經同東東(陳曉東)傳過緋聞嘅台灣女星葉安婷,第一次做台灣八點檔重頭劇《美麗俏佳人》,擔正做第一女主角,但係台灣好多網友留言批評佢生得唔靚,個鼻似足「蒜頭」,又話佢演技差。葉安婷知道之後好沮喪,佢話好唔容易先至喺同東東嘅緋聞度行返出嚟,𠵱家俾人咁講,搞到佢喺拍劇現場成日都喊,重想撼頭埋墻。

想學蔡依林抽脂
葉安婷話本來佢個角色係陽光美少女,但係導演見佢成日喊苦喊忽,本來係喜劇,卒之就改咗悲劇結局嚟配合佢。葉安婷呢套劇𠵱家啱啱拍完,佢話兩年之內都唔打算再拍劇,因為經歷太恐怖,佢覺得自己就嚟有憂鬱症。
葉安婷又話對自己嘅樣同演技都冇晒自信心,佢想去抽面部脂肪,因為聽聞蔡依林抽過面部脂肪,塊面尖咗好多,所以佢都想去抽。佢重話以前同東東傳緋聞,係因為自己性格太直,所以令到東東反感,佢話以後講嘢會小心謹慎啲。

珈潁食糙米護膚
珈潁噚日到新城接受《美麗週末》訪問,雖然呢幾日落雨,天氣凉浸浸,但珈潁就已經急不及待着上吊帶小背心見人,馮仁昭見佢啲皮膚滑溜溜,問佢有乜護膚心得,佢就話:「我會用豆類天然產品做全身磨沙,而且我𠵱家食長齋,又食糙米,啲皮膚就自然好咗好多。」珈潁又話近日因為接拍咗一個洗頭水廣告,所以要勤於護理頭髮。

盧巧音個唱邊唱邊除
盧巧音(Candy)噚日去新城做訪問,佢呢排都係忙緊個唱綵排,佢話喺個演唱會入面,可能會愈着愈少,但係𠵱家都係構思當中,因為一路唱一路除衫都幾麻煩。而講到佢早幾日喺電視播嘅音樂特輯,收視唔係咁好,只得十四點(約有八十九萬觀眾),比起前周收視跌咗成十一點,Candy話:「唔緊要啦,最緊要朋友話拍得幾好咪得囉。」

陳慧珊逆市收Bonus
陳慧珊(Flora)噚日為SlimPro纖體產品喺柴灣一間影樓拍攝新一輯平面照,Flora今次嘅酬勞達百萬,佢話:「我今年真係好好彩,時勢咁差,已經拍咗兩個廣告,重已經爆咗TVB全年嘅騷,再接劇嘅騷錢就係bonus。」問Flora收入如此豐厚,會唔會買樓或投資?佢話:「我個人好悶,又怕睇文件,加上我啲喺銀行做嘅朋友話𠵱家嘅時勢係cashisking,所以我都係擺晒啲錢喺銀行。」

羅秀茵嫲嫲今出殯
賭王新抱羅秀茵嘅阿嫲,亦即係維他奶集團主席羅友禮嘅媽媽羅鍾芹英女士,早前去世,享年九十八歲,噚日喺香港殯儀館設靈,今日出殯,成個喪禮以佛教儀式舉行,由於羅老太成九十幾歲,所以係屬於笑喪,靈堂上都點着紅燈籠!

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載