蘋果日報 | APPLE DAILY
› 選擇地區
三藩市
紐約
洛杉磯
其他美國地區
2003年07月27日

當年為五千元離無綫風風雨
陶大宇失業九個月降價回巢

下月陶大宇回無綫拍劇,執教鞭扮麻辣老師,且看他能否東山再起。

陶大宇六年前憑電視劇《刑事偵緝檔案》成為無綫一哥,但當時無綫拒加他五千元人工,故大宇沒有續約,無綫從此便將他封殺。離巢後,大宇試過九個月沒工開。下月他將重投娘家,就算薪金少了幾千元,也肯為機會低頭,「師奶殺手」決收復失地。

相關新聞:家庭篇:拒絕生育

事業篇心中冇「一哥」
陶大宇當年拍無綫電視劇《刑事偵緝檔案》,飾演幹探張大勇,至今令人難忘,那時他在無綫紅得發紫,被封為「師奶殺手」。可是,六年前他在事業高峯期與無綫傾續約,因未能爭取每集加薪五千元而拒絕續約,之後在一些訪問中,他又抨擊無綫,有傳因此而觸怒無綫高層曾勵珍,無綫對他下了封殺令,不再邀他拍劇。

同珍姐關係好
大宇離巢後拍了幾套內地劇,但未見佳績,直至年前他拍亞視劇集《縱橫天下》,飾演狂人利兆天,人氣又告反彈。當時無綫曾向他招手,惜雙方同樣因條件問題談不攏。結果頭尾輾轉六年,下月「師奶殺手」終於歸位,重返無綫與《刑偵》老拍檔郭可盈再續未了緣,拍攝港版《GTO》、暫名《青出於藍》之三十集新劇,他在劇中與可盈飾演教師,而其老友歐陽震華則扮校長。
六年起跌浮沉,不無辛酸,日前他在銅鑼灣接受訪問時說:「今次我返去,靠隻耳聽番嚟,知道有好多人都好開心,對我嚟講返去亦係好事嚟嘅,可以解開一個情意結。我並唔係好似之前報道所講,同珍姐水火不容。坦白講,我今次返無綫人工重少過走嘅時候,肯簽除咗係機會之外,亦都希望話畀人聽我同珍姐冇嘢。」

懷疑自己唔得
大宇當初為幾千元離無綫,但現在薪酬比之前少了幾千元也肯回巢,他說:「係咁㗎啦,每年發生嘅事都唔同,做人有好多嘢要講timing,以前為啖氣,𠵱家為機會,大家要就嘅。」

大宇曾批評無綫而遭封殺,對於當年的火爆言行,他說:「好似董生(董建華)咁講,我唔會講對唔住,當年我係冇消化就將啲嘢講出嚟,年少氣盛,原來我嘅青春期都好長,𠵱家先成熟。嗰時自己好細路仔,而我早排見珍姐時,佢都有話以前嘅嘢唔好提,我都多謝佢,呢句說話令大家感覺舒服。」
在過去的日子中,大宇覺得去年是他人生中的低潮,因他竟然白坐九個月,他說:「之前喺內地拍劇,錢賺多咗,亦打開咗內地市場,離鄉別井有時係會寂寞啲,但都會有另一啲滿足感。我舊年拍成龍間公司開嘅電視劇《大班密令》,拍得好辛苦,但唔明係因乜關係,令套劇胎死腹中,都唔知有冇賣過埠。舊年農曆年拍完呢套劇之後,我本來接咗兩部內地劇,人哋畀咗定啦,但最後話唔開,將我所有計劃打亂晒。跟住啲嘢無啦啦全部停晒,我坐咗九個月冇工開,覺得好唔如意,我重懷疑自己係咪開始唔得,係咪啲人唔鍾意我。」

睇好陳豪林峯
大宇選擇在這個時間回巢,外界總覺得他有意收復失地,要坐上羅嘉良一哥之位,他即笑說:「一乜哥呀,喺我心目中,呢個世界冇阿哥、阿姐,大家喺唔同嘅崗位做唔同嘅事,唔通阿哥同阿姐唔使做呀?」
現時無綫鬧小生荒,大宇卻看好陳豪及林峯能上位,他說:「林峯幾好,幾勤力,陳豪個型幾煞食,個人都幾健康。」而這次他回巢亦信心十足,大宇笑說:「我對監製、歐陽震華同埋郭可盈有信心,佢哋都係殺手派嚟。」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載