› 選擇地區
三藩市
紐約
洛杉磯
其他美國地區
香港 台灣 北美
 
2004年03月25日

馮仁昭四圍超:
王傑怕吊鹽水頂撞公司博炒

Twins係英皇寵兒,相比之下,王傑受寵程度梗係有天壤之別啦。
資料圖片

王傑當初喺加拿大回流香港簽約英皇,除咗幾年前重出樂壇時風光過一輪之後,呢幾年英皇全力捧年輕歌手,王傑嘅發展就唔多如意喇,佢愈做愈心淡,但公司又唔肯同佢解約,所以佢出親嚟講嘢就句句有骨,成日窒人,目的只係博公司炒魷!

仍有五年約
王傑喺上個禮拜同幾位朋友喺君悅酒店飲下午茶,其中一位朋友事後同馮仁昭講,話王傑好唔開心,因為佢自知公司將火力集中喺偶像歌手身上,即使佢點盡力做嘢,公司都唔會睇佢,佢嘅工作量就更加少到吊鹽水咁,所以之前傳佢網上賣衫嚟解決經濟問題,而佢亦都曾經同公司提過解約,但英皇就一口拒絕。
王傑簽英皇十年,重有成五年至約滿,想走又走唔到,於是咪玩激將法,聽聞佢早排話香港樂壇惡性循環自食其果嘅言論,就俾公司捉咗去照肺,其實佢係特登講埋啲頂心頂肺嘅言論,想博英皇同佢解約。

抑鬱症未愈
王傑個朋友重話佢抑鬱症未愈,但重成日走去酒吧劈酒,啲朋友都好擔心佢。馮仁昭覺得王傑又唔使咁灰嘅,人生總有起有落,𠵱家係低潮,跟住落嚟咪係反彈嘅時候囉!凡事睇開啲,唔係就好易谷到病。

杜麗莎歎新仔冇人教
杜麗莎(Teresa)噚日接受新城電台訪問,佢話下個禮拜就會開工,準備開演唱會,到時囡囡重會粉墨登場,同四十個小朋友一齊唱《真的愛你》。另外,噚日商台播出Teresa嘅錄音訪問,被問到對現時歌手有乜睇法時,佢就話:「𠵱家嘅歌星好慘,因為冇人培養,又冇時間瞓覺,乜都要佢哋做,你話係咪變咗機械?」

任賢齊內地歌迷夠熱情
任賢齊噚日喺台灣錄影電視節目,佢更大談喺內地工作時嘅趣事,小齊話曾撞見飯店服務生偷着佢嘅衫,以及歌迷冒充舞蹈員趁機接近佢。因為內地嘅歌迷好熱情,並經常喺嘴邊掛着一句「我愛你」,小齊話次次聽到都好感動。

蕭亞軒賣衫做善事
蕭亞軒近排做善事做到停唔到手,計早前佢將某周刊對佢嘅賠償,捐到台灣一個慈善機構之後,蕭亞軒最近又將佢嘅幾件靚衫捐出嚟拍賣,拍賣得嚟嘅款項,重會用作慈善用途㖭。蕭亞軒話希望可以用自己嘅能力幫助到有需要嘅人,盡一點力量喎。

張東健身在北京心在康城
張東健𠵱家喺北京繼續拍緊《無極》部戲,佢好重視呢部戲,因為佢想憑呢部戲打入國際市場,日前佢對韓國傳媒講:「《無極》會參加出年嘅康城影展,所以我對呢部戲係有一定期望。」張東健拍完呢部戲,重會拍多套韓、日合作嘅連續劇,以佢韓國一線影星嘅地位,重點會拍純韓劇吖,擺明係為咗打入日本市場啦。

陳錦鴻黃山度蜜月
陳錦鴻噚日喺無綫將軍澳電視廣播城為新劇《驚艷一槍》試造型,剛同杜雯惠結咗婚嘅佢話婚姻生活愉快,佢話:「我雖然要拍劇冇時間對住佢,但以前都成日對啦,我遲啲打算同老婆去黃山同武夷山補度蜜月,聽講嗰度啲茶園好靚。」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載