蘋果日報 | APPLE DAILY
› 選擇地區
三藩市
紐約
洛杉磯
其他美國地區
2004年04月02日
馬上成為壹會員

馮仁昭四圍超:
劉偉強踩蘇菲亞「攞獎靠父蔭」

劉偉強話最欣賞李翰祥同張徹兩位導演。

自從《無間道》大收旺場之後,導演劉偉強不時被邀請去主持好多講座同演講,佢前晚就喺沙田香港專業教育學院主持一場叫做「創意工業——靈感與革新」嘅座談會,有百幾個學生參加。
當中有學生問劉偉強最欣賞邊個導演,佢話:「李翰祥同張徹,我一九八一年跟過李翰祥做小工,嗰陣人工十蚊一日。」提到今屆奧斯卡,劉偉強好唔客氣咁話最唔滿意《迷失東京》嘅蘇菲亞哥普拉得「最佳編劇」獎,劉偉強覺得因為佢係《教父》導演哥普拉個女,所以係靠父蔭先至得獎,有學生提到話蘇菲亞好鍾意王家衛,劉偉強就好勞氣咁話:「咁咪中晒毒囉,人哋王家衛邊係咁拍㗎?」

大讚《標殺令》
彈完蘇菲亞,劉偉強就大讚《標殺令》導演昆頓塔倫天奴同張藝謀,佢話:「我好欣賞張藝謀前期嘅電影,好有鄉土味,同我風格差唔多,一樣都係攝影師,後來《英雄》商業化咗。」
提到有傳佢執導嘅《頭文字D》有成七千萬製作費,劉偉強竟然重呻話怕唔夠錢使,佢話:「成套戲會喺日本拍,我會忠於原著,𠵱家頭痛緊錢嘅問題,日本嘢好貴,真係要小心啲計budget。」

仔仔Fans愚人節被玩
日前成都有酒吧喺當地周刊刊登「四月一日——愚人節,周.渝.民」喺某音樂酒吧開歌友會嘅廣告,重登咗仔仔嘅相片,但事後酒吧老闆就話其實諗住喺愚人節開吓玩笑,佢講嘅係搵咗姓「周」同姓「俞」嘅兩位本土歌手到場表演啫,不過有歌迷就好不滿,打算向當地嘅消費者保護協會投訴,同時仔仔嘅經理人亦話唔排除告間酒吧侵權。

Twins天鵝頭冧掂大老細
人氣組合Twins早排喺演唱會上,曾經以一個天鵝頭同七彩眼妝嘅造型示人,令手提電話廣告商LG嘅老闆留下深刻印象,佢哋最近就搵Twins拍平面廣告,重用改良版嘅天鵝頭同彩妝拍㖭。拍廣告嗰日,Twins趕完戲漏夜趕返香港,佢哋本來好攰,但廣告商準備咗大堆零食,加上Twins諗起開個唱嘅情景,結果好快已經唔記得眼瞓啦。

安雅出自傳講勒戒
安雅近日喺台灣推出嘅自傳《4999的印記》,書中講番佢前年八月因搖頭丸事件入勒戒所十日,佢話呢十日令佢重新選擇自己嘅人生路。之外佢重敍述番自己三個階段,分別係小時候移民美國、母親逝世後佢由優異生變為問題青年,同埋佢經過咁多事之後如何發奮等。

王蓉回收玩嘢封面
王蓉喺全新國語碟中,親自作曲同填咗一首《Everywoman》(普通女孩),為咗配合呢首歌,唱片公司特別印製一批以江青同宋美齡為封面嘅CDsingle,然後派畀傳媒。但王蓉擔心呢批single送到內地會引來尷尬,所以喺送往內地途中全部收番。馮仁昭覺得好彩唱片公司收得快咋,如果唔係王蓉怕且都有排煩。

學友𠱁老婆先苦後甜
張學友噚日去到港台接受訪問時,話之前作咗首歌畀老婆羅美薇(MayMay),佢作好之後重即刻話畀老婆聽,點知佢講咗一句「係咩!」就行咗去,搞到學友不知幾咁傷心。不過,MayMay前日聽收音機時再次聽到呢首歌,之後就讚話幾好聽,學友先至開心番咋。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載