蘋果日報 | APPLE DAILY
› 選擇地區
三藩市
紐約
洛杉磯
其他美國地區
2004年05月21日

馮仁昭四圍超:
亞姐復辦廣招自由行靚女

自九九年由樓茜妮攞咗冠軍後,亞視就停辦選美,只係在第二年舉辦過《中華演藝人才選拔賽》嚟代替亞姐。
(左起)饒林紅、樓茜妮、陳薇
資料圖片

無綫嘅十八位準港姐日前正式見傳媒,𠵱家已經開始受訓,亞視亦不甘示弱,自○○年開始停辦亞洲小姐之後,今年又會重辦亞姐,聽講下個禮拜會公布詳情,開始接受報名。

冇三粒星都得
亞姐一向畀人「騎呢」嘅感覺,但聽聞大會希望重辦亞姐後可以大洗底,盡量將啲女仔搞得高貴啲。馮仁昭收到風,大會將佳麗嘅參賽年齡限制喺十八到二十五歲之間,想當年宮雪花以四十七歲高齡參選,但𠵱家就冇得玩喇!不過亞視就放寬咗參賽者嘅身份限制,就算冇香港三粒星身份證都得,而參賽者更可以嚟自世界各地,唯一要求係一定要有華裔血統,內地同胞亦無任歡迎,當然佢哋一定要有方法逗留香港參加集訓至得。
不過大會今年唔會搞準決賽,但決賽前會分香港、亞洲同中國三大賽區挑選參賽者,暫時預計會挑選二十位來自唔同地方嘅靚女比賽,然後從中揀冠亞季出嚟,馮仁昭相信呢個選舉都會好新鮮。

任賢齊海報玩逃跑
任賢齊、陳慧琳同張家輝合演嘅電影《大事件》,推出咗兩款一紅(圖四)一綠(圖五)海報,但唔講唔知,呢兩款海報係有連貫性。導演杜琪峯為咗突出戲裏面警匪鬥智嘅真實感,紅色嗰款見到大賊小齊(圖四箭嘴示)喺前面跑,陳慧琳同家輝就喺後面追,而綠色嗰款係小齊逃跑之後,陳慧琳同家輝先追到上嚟,咁有創意,唔怪得小齊話要十套留念啦!

侯莎莎名字被笑感無奈
新人侯莎莎(Sasha)嘅名字不時俾人取笑「喉沙沙」,佢話:「以前喺內地冇人笑㗎,因為國語發音係冇問題,但喺香港一聽到就會笑,重笑我喉沙沙點學人唱歌㖭。」Sasha喺瀋陽音樂學院畢業,希望有機會出唱片做歌手,不過佢𠵱家會以拍戲為主,佢話:「我想好似陳小春咁又跳舞又唱歌,雖然我𠵱家有學唱歌,但唔會咁快做歌手,最重要打好根基。」

鄭伊健攞阿Sa命
鄭伊健噚日到商台接受訪問,最近佢同蔡卓妍(阿Sa)喺泰國拍電影,阿Sa又屙又嘔,伊健笑住話:「梗係啦,啲嘢好食到嘔同辣到屙嘛,不過阿Sa同我拍其中一場飛車戲,佢真係交咗條命畀我,好彩最後都冇事。」

薛家燕培訓演藝人才
薛家燕噚日去咗尖沙嘴一間學校,同嗰間學校嘅校長商討籌辦家燕媽媽藝術中心,家燕姐話:「都要投資成七位數字㗎,教中英數之餘重有唱歌、跳舞、粵劇同埋話劇呢啲興趣班,希望發掘學生另一方面嘅潛能。」

梅媽生活有問題照飲茶
梅媽噚日同大仔梅啟明、菲傭去銅鑼灣翠園飲下午茶,梅媽見到記者時都好寬容。幫梅艷芳搞保險嘅連炎輝前日話梅媽生活有問題,梅媽亦承認生活的確好有問題,過年之後就未收過錢,重講笑問記者係咪有錢借。之後梅媽就入茶樓,重叫記者唔好跟住佢。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載