› 選擇地區
三藩市
紐約
洛杉磯
其他美國地區
香港 台灣 北美
 
2004年05月30日

捱過路人甲 家底變負累
林峰是非壓迫匿埋喊

林峯玩攀石時,奮力向上,有姿勢有實際。

林峯入行六年已穩佔無綫小生一席位,事業看似一帆風順,原來他初出道時做過不少「路人甲」一類角色,及後當林峯漸冒起頭來時,是非與緋聞卻一單緊接一單,才二十四歲的他表示壓力很大,更坦承試過躲在家大哭一場。

相關新聞:愛情篇:談情最弱

事業篇:臨記生涯
林峯十八歲時在美國考入大學攻讀建築系一年級,當年趁暑期返港度假時,透過父親好友、無綫製作資源分部前助理經理陳灌明引薦入無綫藝員訓練班作旁聽生,自此便順利進入娛樂圈,不過是非跟緋聞卻從未停過。

曾飾演斟茶遞水
現已穩佔無綫小生一席位的林峯,在去年台慶奪得「我最喜愛的飛躍進步男藝員」獎,拍過的劇集包括《流金歲月》、《美味情緣》、《尋秦記》、《雲海玉弓緣》、《律政新人王》和《血薦軒轅》等,佔戲均頗重。不過林峯透露初入行亦曾經歷「路人甲」的日子,他說:「訓練班一出就喺星河頻道裏面嘅娛樂新聞節目做主播,一開始以外景為主,可能同我識講普通話有關,所以俾人揀中,之後有機會拍劇,都做過唔少路人甲乙丙角色。喺《茶是故鄉濃》裏面有場茶藝比賽,我就係做斟茶嗰個,試過喺劇裏面做兩個角色,不過都冇名㗎,加撇鬍鬚就變第二個角色。」

「唔掂就讀番書」
林峯家境富裕,家住半山豪宅,林父從事建築及貿易生意,林峯承認某程度上比別人佔優,不過總括來說卻是壞處多於好處。他說:「唯一好處係經濟上唔使照顧屋企,等我無後顧之憂,可以專心去做路人甲乙丙,慢慢開始有機會講多幾句對白,直至喺套劇裏面有個名俾人叫,都做咗年幾,就算行行企企我都好努力好認真㗎。不過就成日俾人提住我嘅家庭背景,咁令我做起嘢上嚟反而更加努力,令人哋接受我。」
林峯對於當年放棄讀建築而投身娛樂圈,並不感可惜。他說:「我要做藝員,爸爸一啲都冇阻止,但就有定個期限出嚟,唔掂就要讀番書。」

母親經理人開解
林峯入行以來是非不斷,有指他是利孝和夫人的世姪,又有指他到夜總會消遣和曾經整容等等。林峯坦言因抵受不住壓力,躲在家裏流男兒淚。他說:「同利夫人真係冇親戚關係,係一大班人見過吓,𠵱家見到面都避忌㗎,因為唔想搞到人哋。之前有段時間都幾唔開心,我懷疑自己係咪做得唔夠好,我好少喺人哋面前喊,不過都試過匿埋喊。好彩我媽咪同經理人經常同我傾偈,我覺得入行後真係令自己加速成長。」
採訪:卓美娟
攝影:陳偉權
場地:香港攀山訓練中心
服裝:OZARKGEAR

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載