› 選擇地區
三藩市
紐約
洛杉磯
其他美國地區
香港 台灣 北美
 
2004年05月30日

出院高調同細妹賀壽
馮仁昭四圍超:戴蘊慧咬住吳國敬唔放

戴蘊慧攬住阿妹戴辛尉,為佢慶祝生日。

歌唱老師戴思聰個女戴蘊慧日前被傳自殺入院,佢出院之後翌日(即前晚)就好開心咁同個妹戴辛尉唱K慶祝生日,我馮仁昭都覺得好戲劇化。席間重有班圈外男性朋友,同埋久違嘅蔡曉儀。戴蘊慧同阿妹切完蛋糕重嘴對嘴錫錫㖭!

「唔使插我兩刀」
雖然同成班朋友開心開party,但戴蘊慧一講到前男友吳國敬,即無喇喇扯火,佢聽到話吳國敬慰問佢,叫佢食少啲藥同睇心理醫生,戴蘊慧好嬲咁話:「你叫佢食少啲××啦,次次我出事佢就出嚟講嘢,都十幾年冇見㗎啦,佢冇資格批評我,佢連我個仔都未見過,唔應該講咁多嘢。」
戴蘊慧之前話當年曾借二萬蚊畀吳國敬,佢前晚話唔係要對方還,如果對方還錢就捐去保良局,戴蘊慧話:「佢都冇打過畀我,想出鏡咪講句叫我保重就夠啦,唔使我有事就插我兩刀,要睇心理醫生嘅係佢,唔掂我可以借錢畀佢睇,唔好侵犯我家人,我前夫同仔都好重要㗎!」
戴蘊慧噚日同戴辛尉去酒店做運動,戴蘊慧話吳國敬打過畀辛尉,戴蘊慧話:「我冇心講㗎,我唔想中傷佢,變罵戰就唔好啦,我今日精神都OK囉!」

林志玲出名反添煩惱
台灣名模林志玲噚日患重感冒,但都去台北一間學院出席講座,分享保養靚腳嘅心得,問佢有冇因知名度急升而帶嚟困擾?佢話:「因為有這些負面新聞,才有我今天的知名度,但是不知為甚麼社會的價值觀如此膚淺?有錢就跟富商有關,漂亮就跟整形有關?」馮仁昭覺得林志玲唔使咁悲觀嘅!

孫燕姿同阿妹傾狗經
孫燕姿呢排喺台灣忙於綵排內地演唱會,佢日前趁綵排完之後走咗去張惠妹屋企,大家以為佢兩個交流音樂上嘅心得,點知佢哋原來係傾狗仔經。據知阿妹每次出埠做嘢,都會叫佢細妹幫佢照顧兩隻愛犬,不過佢就算中間只得兩三日休息,都會抽時間返屋企睇吓兩隻狗。

曾華倩撐偉仔唔小器
曾華倩噚日同朱慧珊喺九龍灣國際展貿中心,出席亞視台慶。曾華倩被問到對舊愛梁朝偉不甘喺康城輸畀十四歲嘅小朋友,曾華倩力撐話:「我諗偉仔唔係覺得輸畀細路唔抵,佢係覺得部戲好好,但𠵱家輸晒,可能因為咁而覺得失望,唔係佢小器。」

章小蕙新片煞科要慶祝
章小蕙噚日喺中環街頭拍攝楊凡執導嘅電影《桃色》,吸引咗唔少市民圍觀,章小蕙話:「套戲今日煞科,應該都會慶祝。」而導演楊凡亦表示章小蕙喺戲中嘅表現唔錯。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載