› 選擇地區
三藩市
紐約
洛杉磯
其他美國地區
香港 台灣 北美
 
2004年06月01日

演協爭拗陸續有嚟
馮仁昭四圍超:家輝窒秋生冇盡會員責任

黃秋生前日抨擊演藝人協會專搞聯誼活動。

梁家輝前晚喺尖沙嘴出席「童聲妙韻頌親恩」慈善音樂會,同二百個小朋友講親子故事。
黃秋生前日同傳媒講,炮轟演藝人協會冇幫會員謀福利,成日只顧聯誼,重話演協只不過係魚翅鮑魚團,食完放個屁就走。家輝聽過秋生呢番話後,佢就同記者講,佢話自己今年雖然唔再係理事,不過佢都幫個會做過唔少嘢,所以都好關心呢件事。家輝覺得秋生應該多啲返個會幫手,唔返就唔清楚會務。

照顧退休前輩
家輝解釋演協係有聯誼性質,咁都係照顧退咗休嘅前輩,但亦都幫過唔少藝人追欠薪、訂合約、爭取到上電視台有車馬費咁,而且平時理事開會飲茶灌水都係自己出錢。
佢重建議秋生有唔明唔清楚嘅嘢,應該主動打電話返會問,只係同傳媒講,對個會唔公平,咁係冇盡會員責任,應該提出對個會有建設性嘅意見,而唔係同第三者講。

《2046》傳補拍鞏俐戲份
王家衞套《2046》喺康城參展,因為遲交片而搞到好狼狽,套戲首映後,有啲外國記者睇完部戲後,覺得部戲好似未拍完咁,所以有記者問王家衞康城嘅版本係咪最後一個版本,當時導演就話係,不過噚日台灣有報道話《2046》喺七月又要去泰國補戲,鞏俐到時都要去泰國補拍㖭,連馮仁昭都覺得呢部戲好似跑緊馬拉松,拍極都拍唔完。

小春撐阿Sam做特首
陳小春噚日揸咗架價值九十幾萬嘅新車RangeRover到港台接受訪問,小春一向視許冠傑(阿Sam)為偶像,亦同佢份屬好友,所以小春話阿Sam開個唱要佢斟茶遞水,跪地趴地都冇問題,重話阿Sam做特首一定掂,不過講到佢冇份唱《04祝福你》,小春就酸溜溜話:「我有少少唔開心㗎,畀我唱兩個字都好呀。」

Isabella獻計趕絕煙民
梁洛施(Isabella)同Boy'Z噚日出席「2004世界不吸煙日」活動,Isabella一向反對吸煙,不過佢嘅媽咪同偶像謝霆鋒都係煙民,Isabella話:「最好政府就立法冇煙賣,因為我媽咪食啲煙嘅焦油含量都幾勁。」Isabella亦勸偶像謝霆鋒慢慢戒煙,不過佢就話第時擇偶一定唔會揀煙民。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載