› 選擇地區
三藩市
紐約
洛杉磯
其他美國地區
香港 台灣 北美
 
2004年09月25日

僅《無間道II》奪最佳剪接獎
馮仁昭四圍超:亞太影展港片鎩羽而歸

《無間道Ⅱ》喺亞太影展只係拎咗「最佳剪接」獎。

噚晚《第四十九屆亞太影展》喺日本福岡舉行,呢次一共有三十九部戲角逐十六個獎,香港都有三部片參賽,分別係劉德華主演嘅《大隻佬》、黃秋生主演嘅《無間道II》同張栢芝主演嘅《旺角黑夜》都入圍,不過香港只係憑《無間道II》拎咗個「最佳剪接」,得獎者彭發同彭正熙都冇去攞獎。

《原罪犯》導演得獎
頒獎禮儀式好簡單,就連行紅地氈都慳番,結果由台灣嘅《台北二一》得到「最佳影片」,「最佳導演」就係韓片《原罪犯》嘅朴贊郁,呢套戲嘅男主角崔岷植就拎埋「最佳男主角」,而「最佳女主角」係吉隆坡電影《Pontianakscentofthetuberose》嘅MayaKarin。「最佳男配角」係日本電影《Kwaidan》嘅香川照之,「最佳女配角」係台灣電影《黑狗來了》嘅林美秀,佢之前都喺第四十屆金馬獎都攞過女配角。
林美秀事後大談得獎感受,佢用國語話:「多謝評審團給我的肯定,這個獎是整部電影人員的榮譽。」
「最佳影片」《台北二一》嘅導演楊順清攞完獎後即打電話同老婆報喜,佢用國語話:「我得這個獎很感動,本來我都看好對手《無間道II》,結果可以勝出,謝謝評審支持。」
記者陳月萍、仇志德福岡直擊

陳法蓉唔覺意收胸
朱茵同陳法蓉兩位好姊妹噚日齊齊喺美孚出席宣傳活動,陳法蓉重以一身低胸裝大騷身材,令朱茵當場失色,陳法蓉話:「我用健康方法減咗十四磅,條腰𠵱家廿二吋,但世事冇兩全其美,個胸部都連帶細咗,惟有搵吓有冇一啲健康嘅方法健胸。」

林曉峰添七磅熙仔
林曉峰(阿Lo)老婆康子妮噚日產下第二胎,馮仁昭打電恭喜阿Lo時,佢心情都相當興奮。阿Lo話老婆第二胎又係仔,重七磅,相當健康,佢已經幫個仔改名林熙,加埋大仔林寶,即係「小寶與康熙」囉。咁啱就嚟到中秋,馮仁昭問佢幾時可以影番張一家四口嘅大合照,但阿Lo話佢大仔怕醜,遲啲再算喎。

余文樂帶病掃貓屎
余文樂噚日去電台接受訪問,佢呻自己大病初癒,重要打理隻愛貓,搞到冇覺好瞓,佢話:「我啱啱先好番,但怕自己再病,夜晚十一點幾已經瞓。點知今朝早突然聞到好臭,最後發現隻貓喺我床下底屙屎。佢重踩到啲臭臭,之後喺屋入面行來行去,搞到我要清理乾淨先可以再瞓。」不過阿樂始終都係錫貓,重帶埋佢哋為新碟拍封套。

《青出於藍》被批醜化教師
無綫新劇《青出於藍》推出以嚟接獲唔少投訴,至噚日為止影視署共接到十三宗,其中十二宗投訴呢部劇醜化教師形象,以及對青少年有壞影響,另外一宗就投訴內容有詆毀北方女性之嫌。《青》劇監製梅小青噚日話佢哋只係反映現實,認為觀眾濫用咗投訴嘅權利。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載