蘋果日報 | APPLE DAILY
› 選擇地區
三藩市
紐約
洛杉磯
其他美國地區
2004年11月17日

馮仁昭四圍超:
安仔返母校投案曾偷小食部汽水

成班小學生將手冊攞畀安仔簽名,好鬼熱情。

許志安噚日返到位於黃大仙嘅母校孔教學院大成小學,拍攝介紹學校片段,佢一踏足母校即大受歡迎,全校八百師生坐喺操場迎接安仔,幾乎去到每一個角落都有學生高呼佢個名,但有啲學生就將李克勤同安仔混淆咗,啲老師就更加瘋狂,撇甩學生同安仔影合照。

笑不攏嘴
安仔又帶領學生齊齊念校訓,當佢問班學生邊個唱歌叻時,成班學生好識做咁指住安仔,𠱁到安仔好鬼開心,重企埋去學生中間影相,十分親切。
安仔自爆細個時曾經偷汽水,佢話:「我細個時好心散同貪玩,老師都覺得我曳㗎,重成日罰我企走廊,我又成日駁阿sir嘴,俾佢打手板。我最內疚係偷過小食部幾支汽水,今次返嚟,好想補償番㗎,但可惜小食部已經執咗笠。」佢唔自爆,都估唔到佢咁曳曳!

陳霽平趕拍劇失真銀
陳霽平噚日喺將軍澳電視廣播城,參與無綫新劇《YummyYummy》拜神儀式,佢話最近忙於拍無綫劇,所以連出面嘅工作都唔可以接住,佢話:「之前有套電影以英文對白為主,但咁啱我嗰陣重拍緊無綫劇集,所以推咗,咁我一向英文都好過中文嘅。」

朱慧珊做主持學高檔
朱慧珊前晚喺新城接受訪問,分享點樣享受生活,佢話自己唔係一個好識享受生活嘅人,都係因為幫亞視主持節目先去啲高級餐廳,同認識吓名牌,不過由於工作好忙,所以雖然有固定男朋友,但都冇諗結婚,佢話啱啱拍拖幾個月嗰啲情侶,先會講結婚喎!

陳小韻磨砂曬太陽勁痛
陳小韻同呂頌賢噚日去尖沙嘴出席「IOSSpa」嘅活動,小韻話從未喺香港做過spa,因為氣氛太緊張,所以好難relax,佢話多數去泰國浸spa,佢話:「有次我買咗成個療程唔想嘥,就喺曬太陽前做磨砂,點知曬傷咗,惟有死忍唔出聲。」馮仁昭都戥佢痛!

阿Paul讚朱茵rock得性感
黃貫中(Paul)噚日喺尖沙嘴出席活動,佢女友朱茵近日出新碟,身兼唱片監製嘅阿Paul大讚女友進步神速,問佢認為女友應該走邊類型嘅音樂路線,佢話:「佢嬌滴滴都可以好搖滾,個人性感,唱歌都可以好性感嘅!」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載