› 選擇地區
三藩市
紐約
洛杉磯
其他美國地區
香港 台灣 北美
 
2005年01月04日

權相佑唱悲歌新劇吊高嚟賣

由人氣男星權相佑、延正勛及女星金喜善合演嘅韓國MBC電視台重頭劇《悲傷戀歌》,聽日將會喺韓國播出,相信唔少韓劇fans都好心急,等緊睇呢套劇。韓國MBC電視台今次落重本,除咗請嚟兩位巨星權相佑同金喜善演出外,又遠赴紐約取景,重投資咗一千多萬港元興建劇中拍攝用嘅別墅,單係製作費就已經超過五千萬港元,真係唔嘢少。

料收益超越裴勇俊
電視台就話唔擔心會蝕本,皆因日本富士電視台早排以約三千萬港元買咗播映權,而其他亞洲地區包括中國、台灣、香港、泰國等都願意以一般韓劇嘅兩、三倍價錢嚟購買版權。不過製作人估計劇集播出後,價格會更高,所以除咗日本之外,佢哋暫時都冇賣個版權去其他地方。另外,製作人計劃推出三張《悲》劇嘅原聲大碟,收錄主題曲同埋三位主角所唱嘅插曲。電視台方面重充滿信心,認為《悲》劇帶嚟嘅經濟效益一定可以超越由韓星裴勇俊及崔智友主演嘅《冬日戀曲》,成為亞洲最出名嘅韓劇咁話。

金喜善演失明歌手
而金喜善早前就喺《悲》劇嘅網頁上留言,話對於喺劇中首次扮演失明歌手,擔心會做得唔好。有網友認為金喜善喺電影《飛天舞》同劇集《金粉佳人》中嘅演技麻麻,未必可以演繹好呢個角色。
另外,《悲》劇噚日喺漢城一間酒店舉行試映會,權相佑話雖然好友宋承憲辭演此劇,但佢仍然對呢套劇充滿期待。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載