› 選擇地區
三藩市
紐約
洛杉磯
其他美國地區
香港 台灣 北美
 
2005年01月04日

馮仁昭四圍超:祖名唔怕屍體最怕官恩娜

祖名(左二)喺出席賑災活動時同觀眾分享經歷,官恩娜企喺佢附近,但完騷後佢哋即刻分頭走。

房祖名前幾日到泰國布吉拍攝海嘯災情,前晚佢重趕返香港出席無綫賑災節目《四海同心送關懷》活動。無綫為咗等房祖名出現,重特登拖遲完騷時間,祖名趕到後就話今次去布吉令佢畢生難忘,祖名話:「我係一個好難喊嘅人,生死愛情都難令我喊,但係我最驚親情,我去到醫院見到一個公公,七個人去旅行得番佢一個,佢重對住我苦笑,我真係忍唔住。」

「得我一個影相」
祖名話去布吉拍攝當地情況,亦百感交集,佢話:「我本來想去訪問一啲災民,但係唔知點開口,咁多人一齊去,得我一個頂得住敢影相,但係我對住啲屍體都唔敢望鏡頭。」
一心諗住做善事,唔想畀自己啲緋聞成為焦點嘅祖名,前晚一趕入電視城就即刻入廠,點知企後排隔兩個位就係曾經同佢傳緋聞嘅官恩娜,其實咁都冇乜嘢,點知完騷之後,所有藝人開始離開時,祖名發覺官恩娜就喺附近就即刻彈開,擰轉頭搵路走,其實都唔使咁驚啫,咁樣避法咪重核突!

容祖兒日日歎燕窩潤膚
容祖兒(Joey)日前拍攝即食燕窩廣告,為求有更佳效果,Joey喺拍攝前一個禮拜就開始做mask,加上平日有食燕窩嘅習慣,實行內外滋潤。廣告商為咗今次拍攝,重預備咗一箱燕窩畀Joey,拍一日廣告就足足食咗成個月嘅燕窩,加上得到贊助任食燕窩,難怪Joey話再辛苦都唔怕!

張家輝蝕錢贏官司
張家輝舊年二月九號喺九龍塘根德道左轉入小築泊車時同一架的士相撞,結果被控一項不小心駕駛罪,噚日件案喺九龍城裁判法院審訊,由於的士司機證供同部份證據唔脗合,張家輝獲判無罪釋放。佢話自己遇上咗無妄之災,張家輝噚日話:「我使嘅錢多過我認罪畀罰款,但至少可澄清我唔係一個不小心駕駛人士。」 案件編號:KCS4728/04

高峰私生子案未甩身
內地天后那英男友高峰嘅「私生子案」上年年尾判咗之後,原本以為事件終於畫上句號。但係私生子嘅母親王納文喺除夕前一日又改變主意,重委託兩位律師將上訴狀遞交到北京市朝陽區人民法院,重話不服一審要高峰畀王納文母子每月一千蚊、直至滿十八歲嘅判決,要正式提出上訴。而索償嘅數目就由原來六十九萬人民幣降到四十五萬人民幣。

章子怡同陳慧琳爭影后
中國長春電影節將於本月中舉行,七項大獎提名名單前日公布,其中以章子怡、舒淇同陳慧琳三位角逐影后最惹人注目,《茉莉花開》一片獲最佳華語片、最佳導演同最佳女主角三個提名,成為今次大熱,唔知章子怡有冇機會自百花影后之後,再奪得長春影后呢?

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載