› 選擇地區
三藩市
紐約
洛杉磯
其他美國地區
香港 台灣 北美
 
2005年01月11日

馮仁昭四圍超:金庸出蛤蟆功挾星爺六萬賬災

金庸日前同內地記者會面時,對星爺執導嘅《功夫》讚不絕口。

好少睇首映嘅著名武俠小說家金庸,早排特別抽時間出席咗《功夫》嘅首映禮,日前佢去咗浙江大學出席一個活動時,就同記者講:「我看了周星馳的《功夫》,非常不錯,我很高興看到他拍出這樣的作品。」

「每個地方一萬」
喺《功夫》裏面,星爺除咗用金庸著名武俠小說《神鵰俠侶》主角楊過同小龍女嚟做佢戲裏面兩個角色嘅名外,又引用咗一啲武功招式好似蛤蟆功咁喺套戲裏面。因為係屬於知識產權,所以星爺好識做,專登搵金庸,話要畀番版權費佢,咁金庸就問佢用咗幾多處,星爺就話用咗六處,結果金庸就話:「你用了六處地方,每個地方一萬元吧!」後尾星爺畀咗六萬蚊金庸,而金庸就將呢筆版權費全部捐畀海嘯災民。
星爺套《功夫》截止前日上映十八日,總收五千三百四十萬,上咗成三個禮拜,前日單日都收百二萬,成績唔錯。

洪欣想學莎朗史東蹺腳
洪欣早前以六位數字接拍纖體廣告,今次重係佢第一次着到咁性感,但係佢就強調絕對冇賣弄性感,洪欣話:「我覺得性感係喺骨子裏,自己唔會抗拒性感,但露點就一定唔得,就好似莎朗史東喺《本能》裏面蹺腳嘅經典一幕就好性感。」

孔慶翔處男作仆到直
楊盼盼間電影公司投資嘅戲《我阿媽發仔瘟》,雖然搵咗孔慶翔嚟香港拍,但一樣冇乜幫助,因為部戲上咗三日只得八萬票房,票房竟然連雙位數字都未到,成績都算慘淡。其實睇呢部戲證明搵翔仔做冇乜着數,加上部戲啲宣傳又做得麻麻,部戲嘅題材又唔係咁熱門,票房唔得,真係唔出奇。

唐季禮龍刀無力抗盜版
唐季禮﹦有份監製嘅3D動畫《龍刀奇緣》呢個月六號先至啱啱上映,但近日已經有人擺上網任人下載,噚日佢同馮仁昭講開呢單嘢時,表現得好無奈,唐季禮話:「我知道之後已經即刻同香港及內地有關嘅部門反映,希望佢哋全力打擊網上下載。」

黎姿新劇唔掂賴賑災
由黎姿同張智霖主演嘅《水滸無間道》上周平均收視大跌,跌到得番二十四點,係約一百六十萬人次收看,黎姿噚日返將軍澳電視廣播城就話:「撞着賑災,少咗一日都冇計。」而王喜之前竟然向內地傳媒數黎姿演技十年如一日,無情情燒到佢,黎姿噚日聽咗唔係好相信,重話:「我呢啲燒唔着嘅。」

馬浚偉情僧勾引鍾嘉欣
馬浚偉同鍾嘉欣日前為《皆大歡喜》喺一間庵堂拍煞科戲,話說馬仔要着住一件僧人服引鍾嘉欣注意,重要戴住古時大俠成日戴嗰啲雪山飛狐帽,馬仔即刻覺得好唔妥,但基於演員道德,佢唔鍾意都要戴,好彩冇人笑佢,鍾嘉欣重好好人咁幫佢整理啲衫㖭,咁《皆大歡喜》係喜劇,造型搞笑啲都冇所謂,馬仔唔使咁介意喎。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載