› 選擇地區
三藩市
紐約
洛杉磯
其他美國地區
香港 台灣 北美
 
2005年03月08日

馮仁昭四圍超:
阿梅遺愛人間1500姊妹免費做婦檢

阿梅生前希望盡量幫到啲婦女。

由梅艷芳「四海一心」慈善基金會捐助、位於元朗嘅「家計會梅艷芳健康中心」噚日正式開幕,今次基金會總共捐咗五十萬港紙畀家計會,用嚟買咗兩部檢查子宮頸同婦女盆腔嘅儀器,重會免費同一千五百個領取緊綜援嘅婦女檢查。

阿梅徒弟冇嚟
基金會主席蘇蔡潔蓮(Irene)噚日同太平紳士林貝聿嘉都有出席開幕禮,大會重做咗一齣呼籲婦女要定期做身體檢查嘅話劇。Irene話好滿意今次嘅安排,佢話:「今次非常滿意,因為阿梅係患子宮頸癌去世,我哋照佢嘅遺願,幫番啲婦女,呢度嘅儀器比起好多私家診所重要齊全同先進。」
問到點解阿梅嘅徒弟冇嚟到開幕禮,Irene就話:「係因為呢個會好獨立個體,唔需要同其他人交代。」

栢芝得意忘形整親腳
張栢芝早排幫便服品牌「以純」拍廣告,佢着咗一系列嘅春季時裝,喺三十呎高嘅瓦通紙度紮紮跳,好似拍緊動作片咁。雖然栢芝喺拍攝嘅時候整親隻腳,但係最後佢都忍痛完成拍攝,都算唔話得。

薛凱琪梁炳帶足彈藥探災民
薛凱琪同梁漢文噚日喺機場出現,二人應宣明會邀請探訪斯里蘭卡,薛凱琪話佢買咗兩包糖,準備送畀當地小朋友。梁漢文就話:「我拎咗十個限量版足球去,而我女朋友就拎咗四十個HelloKitty公仔畀我帶去做禮物,我重拎埋個電子琴去作歌。」

陳淑蘭違犯教條陪舊愛
陳淑蘭同舊愛祁文傑前晚去咗元朗出席寧波車嘅齋宴,喺儀式中蘭子成晚都頭耷耷,好唔專心,蘭子事後話:「因為我係基督徒,所以啲儀式係唔做得,祁文傑想搵人陪,而呢次活動係幫尼泊爾孤兒籌款嚟興建學校,都好有意義㗎,所以我咪陪佢嚟囉!」

陶喆唔逃稅自豪
陶喆噚日喺商台接受訪問,話佢出年會再開演唱會。
對於張惠妹最近被追稅一事,陶喆話:「我嘅情況同阿妹唔同,我有美國國籍,喺美國長大,所以我係唔會逃稅,會分得好清楚。」
陶喆表示稍後重會去內地搞巡迴演唱會,但形式上就唔會太花巧。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載