› 選擇地區
三藩市
紐約
洛杉磯
其他美國地區
香港 台灣 北美
 
2005年10月27日

熟男四十感觸深
城城借醉發表冇女宣言

郭富城離去時被問到其心儀對象有否到賀,帶醉的他即時除帽又戴帽,不住儍笑又答非所問。

郭富城昨日四十歲牛一,前晚他約同一眾好友於銅鑼灣一居酒屋開P慶祝。正式踏入熟男四十的城城昨日凌晨酒酣宴罷,離場時勁「貓」兼滿臉通紅,還借醉發表恨拍拖但仍然單身的「冇女宣言」!

昨天是郭富城四十歲生日,為賀踏入男人四十新階段,前晚特於銅鑼灣霎東街醉八仙居酒屋舉行生日會,到賀的好友包括經理人小美、張智霖、無綫綜藝科高層何麗全、寰宇電影公司老闆林小明和排舞師SunnyWong等。

祝願稱帝

城城於前晚十時許抵達居酒屋,沒多久友人便陸續到場。直至凌晨十二時過後,張智霖便先行離場,問他有否送禮給城城?他說:「係架單車,因為我呢排鍾意踩單車,踩單車健康啲㗎!」林小明則稱希望城城能憑電影《三岔口》膺本屆金馬獎影帝。
到凌晨三時許,因醉酒而滿臉通紅的城城終於盡興離開,現場只見他已「貓」得不住儍笑,問他有否收到生日禮物?他笑稱:「今年呀?最緊要個心啫!過咗十二點之後我都四十歲咯!我半醉喇,有啲wingwing哋。」
未知是否因熟男四十添感觸所致,城城竟如錄音機般重複又重複地說:「今晚有成班朋友陪我,自己喺娛樂圈都生活咗一段日子,今日已經到咗四十歲,有好多新工作,重新有啲plan,要完成自己嘅理想。」

語無倫次

日前城城曾自爆有心儀對象,問他對方可有到場祝賀?城城卻答非所問,一時除帽一時戴帽說道:「喺我嘅感情世界,其實好簡單,一切隨緣啦!其實我呢個年紀嘅男仔拍拖好正常,但未有,我性格好傳統、好保守,𠵱家要工作為先,做好份內事,冇理感情嘢。」
表態恨拍拖的城城語畢即被小美推上車,上車前城城忽然對記者說:「好多謝新聞界嘅朋友,等到咁夜,大家都睇住我成長,我知道大家捱更抵夜,真係好多謝你哋,多謝晒!」
採訪、攝影:娛樂突發組

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載