› 選擇地區
三藩市
紐約
洛杉磯
其他美國地區
香港 台灣 北美
 
2005年11月25日

講大話玩血腥
ILoveYouBoyz嗱渣招谷票房

少爺占(前)和Donald為以最佳狀態扮演江湖人物,近日努力健身。
少爺占:啊……!

由商台DJ少爺占和Donald組成的騎呢男子組合ILoveYouBoyz,下月將舉行四場歡樂滿TourPartII之05壓軸導人向笑劇場——《龍兄鳳弟》,二人透露今次會有不少血腥打鬥演出,故近日要不時健身,又笑言為了谷票房,不惜講大話騙fans買飛入場。

由少爺占和Donald擔綱演出的《龍兄鳳弟》,故事內容圍繞兩個社團中人龍興和鳳娣為爭龍頭大佬之位,而展開一場龍爭虎鬥,屆時ILoveYouBoyz會以多個八、九十年代的經典造型亮相。

切合底線

由於今次表演不乏打鬥場面,故少爺占和Donald近日開始健身,務求練得一身肌肉來配合江湖人物造型。日前他們便抽空到九龍灣做gym,Donald表示童年時曾參加少林寺夏令營,故對武打有一定認識,他說:「我都算係有啲功夫底㗎,不過少爺占就會辛苦啲,因為佢對武打冇乜興趣。」少爺占則透露演出時會有一幕血淋淋的斬人場面,他說:「嗰場斬人場面真係會斬到啲腸標晒出嚟㗎,啲手又會斷晒,不過呢場戲唔會好恐怖,總之過到合法界線啦,而且啲觀眾一定會睇到笑。」

鬧爆賤男

至於嘉賓方面邀請名單中包括鄭中基、古巨基、草蜢及吳卓羲等,不過仍未落實。少爺占不惜耍手段谷票房,他笑說:「由於我哋想啲飛快啲賣晒,如果有吳卓羲fans問我哋邊一場睇到吳卓羲,我哋就答佢第一場啦,不過佢可能係第二場嘉賓嚟㗎,咁樣我哋就可以確保呃到好多人買唔同場數嘅飛,但係一切嘉賓未有咁快落實。」
此外,Donald指若成功邀得鄭中基任嘉賓,表演當天會加插一項名為「鬧爆賤男」的環節,他解釋今年「賤男」這個稱呼十分流行,故屆時一定會叫鄭中基站在台上齊齊參與,Donald說:「佢自己都認自己係無賴啦,我相信佢一定唔會介意演出呢一part嘅。」
採訪、攝影:李珮洳
場地提供:君豪會

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載