蘋果日報 | APPLE DAILY
› 選擇地區
三藩市
紐約
洛杉磯
其他美國地區
2006年04月02日

憶故友寄語今宵多珍重
崔萍悔未為翁美玲分憂

五十年代初出道的崔萍,憑一曲《今宵多珍重》紅透半邊天。

「抒情歌后」崔萍跟已故電視藝員翁美玲,看似風馬牛不相及,但私底下崔萍既是翁美玲的雀友,亦是她的知己。八五年,翁美玲自殺前數天,曾致電崔萍訴苦,着她為自己介紹男友,當時崔萍還以為對方開玩笑。沒想到數天後竟接到翁美玲的死訊,崔萍說:「我好內疚好唔開心,如果當時我打少啲牌,陪多啲佢嘅話,佢可能唔會咁!」撰文:戴彩煥

憑一曲《今宵多珍重》走紅的崔萍,雖然其溫婉歌聲贏得抒情歌后的美譽,但柔弱的外表,卻包藏着剛烈的內心。

以死要脅入行

崔萍說:「一九五三年,我喺香港嗰間大華飯店食飯,俾人叫咗上台唱歌,唱完之後,經理走埋嚟叫我不如喺飯店唱、做駐場歌手,但爸爸反對,我好唔開心,覺得唱歌都係玩吓、開心吓之嘛,又唔係做啲乜嘢壞事,我就要脅爸爸,話如果佢唔畀我唱嘅話,我就自殺,爸爸惟有應承畀我試吓。」
崔萍在夜總會唱歌期間,獲名作曲家王福齡和李厚襄引薦給飛利浦(Philips)唱片公司,灌錄唱片,先後推出了《今宵多珍重》和《南屏晚鐘》等經典金曲,及後她翻唱顧媚五九年的作品《相思河畔》,更把這首歌唱紅。七二年,崔萍為全心全意照顧家庭,才正式退出歌壇。
退休後的崔萍仍然跟娛圈中人保持聯絡,不時相約攻打四方城,王晶、劉永、黃杏秀和已故的翁美玲等皆是其雀友,翁美玲更是深得她疼錫的後輩,對方有甚麼心事,總會向她傾訴。

惜陳百強早逝

談到八五年翁美玲自殺身亡一事,崔萍欷歔中帶着愧疚說:「以前佢成日嚟我屋企打牌,湯鎮業都會管接管送。我當年好貪玩,一至五都打牌,翁美玲死之前幾日,曾經打過電話畀我,佢同我講,話好唔開心,問我有冇男仔介紹畀佢識喎。當時我以為佢講吓笑,點知幾日之後就接到佢嘅死訊……當時我真係唔能夠相信,我好內疚好唔開心,如果當時我打少啲牌、陪佢多啲嘅話,佢可能唔會咁!」崔萍更因翁美玲的死而日夜思慮,引起高血壓,可見此事確對她造成重大打擊。
除了翁美玲外,對於曾翻唱其名曲《今宵多珍重》的陳百強,崔萍亦深感惋惜:「好多人翻唱過我嘅歌,但我最欣賞都係陳百強。佢嘅演繹、感情表達同歌曲編排都好好。有次我喺置地飲茶撞見佢,佢都有主動走埋嚟同我打招呼,我覺得呢個後生仔唔單止有才華,仲好有禮貌、好識尊重前輩,可惜咁後生就走咗!」
部份相片及資料提供:崔萍、陳永業

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載