蘋果日報 | APPLE DAILY
› 選擇地區
三藩市
紐約
洛杉磯
其他美國地區
2006年06月25日
馬上成為壹會員

上海直擊
嘉欣:大劉係最大驚喜

既有新歡許晉亨呵護,又有舊愛劉鑾雄關懷,更有狂蜂浪蝶送上門,難怪李嘉欣昨日在上海出席Dior記者會時可以笑得如此狂放自信。
全套Dior
紅色乾濕褸約24,000元
黑色SaintGermain長靴約8,800元
紅色SaintGermain手袋約6,700元

日前36歲生日的李嘉欣獲舊愛劉鑾雄擲20多萬刊登全版報章廣告祝賀,加上近日與新歡許晉亨蜜運中,令她心情靚絕。昨日嘉欣以一身紅色勝利打扮出席上海Dior活動時,坦言因大劉所登的廣告萬分感動,又盛讚對方的出現是她生命中最大驚喜。至於去年與嘉欣拍拖的有婦之夫龐維仁,當嘉欣另投他人懷抱時,前晚也被發現翻啅分居妻子黃美儀。

相關新聞:龐維仁翻啅分居妻

李嘉欣既有新歡許晉亨陪伴撐枱腳,又獲舊愛劉鑾雄刊登報章廣告祝賀,前日她現身機場時忍不住說:「我今年生日過得好開心。」昨日嘉欣以香港代表身份,與內地代表趙薇、台灣名模林志玲及韓國女星金允珍等,一起在上海出席法國名牌Dior記者會。

「佢對我係無條件嘅愛」

大會為保護新聞女王李嘉欣,特地派出50名保安護駕,Dior高層張旨燊更全程貼身照顧。嘉欣昨日穿上一件火紅色Dior乾濕褸示人,雖然打扮並不性感,但勝在春風滿面,十分搶鏡。有備而來的嘉欣在記者補祝她生日快樂後,即自動報料,高姿態狂讚大劉。(李:李嘉欣 記:記者)
記:生日快樂!
李:過咗啦!我今年收到好多禮物,嗰個廣告令我覺得好開心,好浪漫,人生冇機會再遇到20.06.2006呢日,唯一呢一次,真係令我好感動,其實睇完廣告之後,都有同朋友玩「誰是TheOne冇獎競猜遊戲」,之後好多人打畀我,認係TheOne,我又打畀一啲人求證,都唔係。不過我心目中早有人選,過咗兩日,我打畀劉生問係咪佢,劉生同我講:「希望只有兩個人知道就可以喇,一個就係你,同埋我囉!」佢都想我開心,佢已經做到,做得好足夠。
記:初期外界誤會TheOne係許晉亨,劉生有冇呷醋?
李:劉生係絕對唔會嬲!(語氣溫柔)劉生係好大方,佢做過好多、好多令我感動嘅嘢,如果佢係用個廣告追我、想同我拍拖,難度只係一般,我哋已經昇華到好好朋友嘅關係,佢對我係無條件嘅愛,佢好錫我,亦令我相信呢個世界係有「無條件嘅愛」。
記:劉生係咪重新追求你?
李:唔係!(甜笑)今年生日真係好開心,唔係每年生日都會有咁嘅驚喜,今年好特別,佢嘅出現已經係我生命中最大嘅驚喜,我真係好開心有個咁樣對我嘅朋友。
記:許晉亨見到廣告有冇呷醋?
李:做得我朋友,唔會呷醋。
記:有報道指眼科教授林文傑想追你,仲介紹瑪花纖體用800萬搵你做代言人?
李(語調冷淡):若果對方有興趣,請佢聯絡我身在印度嘅經理人陳善之,不過呢個時候有啲咁嘅新聞,大家都明白係乜嘢事啦。

相關新聞:相戀10年難捨難離

大劉:佢開心我開心

記:咁即係只有兩位男士爭你?
李:有一樣嘢,劉生……(停頓,想一想)我同劉生分手咁多年,都係好朋友,佢冇再追我嘅意思。
記:你係咪同許晉亨拍拖?
李:我哋係好朋友囉。
此時Dior高層張旨燊上前緊張地拉走嘉欣,但嘉欣明顯有意繼續接受訪問,記者追問她:「現時有冇拍拖?」她即主動回頭風騷地笑着拋下一句:「有!」之後才離開。
記者昨日致電大劉,提到嘉欣因他登報賀生日之舉而十分感動,大劉說:「咁佢開心我都開心嘅,大家做朋友,長話短說,心照就得。」再問大劉對嘉亨戀的看法?他說:「我唔方便評論,希望佢搵到個好嘅男朋友啦,最緊要佢過得開心。」嘉欣昨日公開讚美大劉是「生命中最大的驚喜」,問大劉又覺得嘉欣如何?他說:「咁佢當然係一個好女仔啦,否則我都唔會咁做啦!」
採訪、攝影:林妃、顏英儀、張止寒

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載