蘋果日報 | APPLE DAILY
› 選擇地區
三藩市
紐約
洛杉磯
其他美國地區
2006年06月25日
馬上成為壹會員

阿Jan細路脾氣 阿葛拮極唔郁
軟硬正面互數

戴住超人變身腰帶,一軟一硬的阿葛與阿Jan,一個勁合作,一個夠硬頸,這樣不協調的拍檔卻又老友鬼鬼,互數都只因太過了解對方吧!

就軟硬天師有沒有不和的問題,我們探討了逾10年,網上的維基百科全書裏,「林海峰」欄目中談到他的軟硬天師年代,有一段是在「葛民輝」或「軟硬天師」欄目裏沒有的:「直至1990年代後期,二人反目,與葛民輝分別發展,有傳林不滿葛的平民品味和接拍一些劣片和他高品味背道而馳,而與葛民輝分別發展。」
從來沒有人知道軟硬為何會傳不和,多得有百科全書爆料。維基百科又稱自由百科,任何網民都可對內容編輯修改,這一段會不會是與林海峰不和的人加進去呢?
1988年由俞琤撮合,歐陽應霽以「軟硬兼施」而起的名字軟硬天師,分開發展10年後,下月復合在紅館舉行《軟硬天師LongTimeNoSee演唱會》,畢竟是相識20幾年的老朋友,是否曾不和也好,軟和硬有如剛和柔或陰和陽,理應是一對。可是,在一場真情互數後才發覺,軟硬並非天生能互補,相處其實是一門藝術。 撰文:蔡如玉

相關新聞:軟硬吵架的藝術

最乞人憎

阿Jan:以前好多嘢做,有次一齊開完通宵戲,大家都好眼瞓,第二朝仲要做節目,佢竟然唔見咗人,由得我一個人做埋個節目,做兄弟嘅要捱一齊捱,要瞓一齊瞓嘛,嗰次佢瞓先,我要好似望夫石咁望佢返嚟,我好𤷪呀,好彩都係發生過一次。
阿葛:最憎佢𠵱家早咗眼瞓囉,以前我哋兩個晚晚冇兩三點都唔瞓,我就擺明係夜鬼。不過𠵱家佢一早要做節目,傾嘢傾到夜晚12點左右就開始唔得喇,我咪盡量將朝早嘅時間同佢傾嘢,夜晚先做自己嘢囉。

最鍾意

阿Jan:最鍾意佢好肯幫人,佢嘅好處係會「協助人哋去完成一件事」,我最初識佢時我話想做個櫃,佢就搵晒啲木材嚟幫我揼,嗰陣覺得呢個人真係好。
阿葛:好多人都覺得林海峰好嚴肅、好認真,其實我就最鍾意佢曳起上嚟嘅時候,真係可以好癲,我最鍾意佢喺錄音室時癲起上嚟個樣,真係好好笑,好正。

相關新聞:軟硬開騷 禁提周美茵

最情緒化

阿Jan:好少見到佢情緒化,試過一、兩次,
嗰陣太多嘢做,拍戲又電台又錄音,有次佢突然發脾氣大叫:「點解咁多嘢做㗎?做死人咩!」基本上佢EQ好高,我情緒化好多,我EQ低過佢㗎。
阿葛:我記得有一次做一個function好似叫做乜鬼《再見利舞臺》,當時利舞臺就嚟拆,佢心情好似唔多好,好大壓力、好sad咁,搞到我好擔心。佢仲有喊呀,但就唔肯講為乜。

最叻

阿Jan:佢可以演繹到唔同角色,喺唔同崗位有唔同嘅葛民輝,我就冇咁大變化,做乜都係呢個樣。面對我佢一定係軟天師,有時我想不如佢硬吓啦,唔好次次我做主,但佢依然係咁。點知佢同其他人合作,要佢做主導時,又可以用強政勵治方式完成,變咗第二個阿葛。
阿葛:佢最叻係個人夠堅持夠執着,固然某啲位佢會妥協,但佢一定有自己嘅堅持位,我份人比較耳仔軟,好多嘢都好易妥協,所以有佢可以幫到我。佢自己發展之後,出咗咁多隻碟我都好欣賞,我每隻都有買㗎,最鍾意《我撐你》,因為好林海峰。

最小器

阿Jan:佢一啲都唔小器,我發脾氣仲多,有時我發脾氣鬧人,佢都唔畀反應,拮極都唔郁,就算有時係我過火咗,佢都冇嘢。
阿葛:阿Jan唔係小器嘅人,佢係細路仔脾氣,係嗰種有問題dayone就會同你講清楚嘅人,但佢都口硬心軟,你叫佢做一件事,開頭佢可能會有啲聲氣話唔鍾意又問點解,但最後佢都會照做。不過有啲嘢喺佢面前一定唔講得,就係林珊珊三個字,或者講到佢家人,佢就成個人呆晒唔識搭嘴。
協力:李珮洳 攝影:仇志德

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載