› 選擇地區
三藩市
紐約
洛杉磯
其他美國地區
香港 台灣 北美
 
2006年07月10日

馮仁昭四圍超
官恩娜街頭祝壽 舊港男離奇到賀

官恩娜(右三)嘅fans帶定貼上壽星女官恩娜個樣嘅香檳,仲有壽包同好多禮物喺電視城門口同偶像慶祝。

官恩娜(Ella)前晚有份擔任「2006香港先生選舉」嘅評判,完騷後已經係凌晨時分,正當大家都陸續離開之際,竟然見Ella同埋七、八個fans喺無綫將軍澳電視廣播城門口開party,原來Ella噚日生日,班fans專程帶埋壽包、香檳同埋大堆禮物,嚟同偶像慶祝。

相關新聞:扒女、LisaS.意法廚藝戰

變臉彈開

見到班fans咁錫自己,Ella開心之餘,仲好豪氣咁拎住支香檳「吹喇叭」逐個敬酒,不過最奇怪嘅係舊年落選嘅香港先生彭冠期,即係最近有份演出新劇《男人之苦》、飾演吳卓羲老友嗰個,竟然隱藏喺人堆裏面,仲拎住杯香檳有講有笑。當被記者發現後,佢即刻變臉,聽見話影合照嗰陣,佢同Ella仲尷尬到即時彈開,Ella解釋話係怕公司唔鍾意,所以唔敢影,不過就當然唔認有嘢啦!
其實喺事發前10分鐘,馮仁昭明明見到彭冠期揸住架電單車離開電視城,馮仁昭問佢點解返轉頭,佢支吾以對話:「頭先揸車嗰陣聽到佢哋電話,咪返轉頭囉!」雖然呢個解釋勉強可以收貨,但睇佢同Ella無端端唔肯影合照,馮仁昭覺得有古怪! 

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載