蘋果日報 | APPLE DAILY
› 選擇地區
三藩市
紐約
洛杉磯
其他美國地區
2006年08月11日

香港電視史活字典
梁舜燕忍喪子痛演上等人

梁舜燕堪稱電視圈長青樹,她更是香港電視史上首位女演員,從黑白屏幕到今天百花齊放,見證將近50年的電視風雲。
攝影:陳順禎

在《真情》中儀態萬千的「上等人」梁舜燕,是第一代的電視藝人,主演過首部劇集,主持過首個遊戲節目,見證香港電視史的發展。98年底,當她最疼錫的孻仔阮惠熊病逝,梁舜燕強忍喪子之痛,依然日日裝笑臉演「上等人」,敬業精神令人敬佩。 採訪:戴彩煥

相關新聞:第一代新聞之花

現年73歲的梁舜燕,除了是《真情》中大家熟悉的「上等人」外,還是香港電視史上一個甚具代表性的人物,她既是首位在電視配音的女藝員,主演過香港首部劇集《幸福的家庭》,擔任香港首個遊戲節目《全家福》的主持,還是第一屆至第四屆香港最受歡迎電視女藝員得主,難怪香港年鑑內也有介紹她的篇幅。

配音主播樣樣皆能

57年由先施百貨香水部售貨員,搖身一變成為麗的映聲報道員,梁舜燕指一切來得那麼巧合,她說:「我細個已經好鍾意做話劇,57年麗的映聲招考藝員,我先生(阮黎明)鼓勵我試吓,但我去到電視台當日已經遲咗,名額冇晒,總監叫我不如試吓做配音,叫我扮三把聲畀佢聽,試完之後就叫我第日返工。」原來香港首個電視節目,既不是新聞也不是戲劇,而是木偶戲。當年為木偶戲配音的,正是梁舜燕,她說:「當年電視用木偶戲嚟做試播,我就配媽媽同個女把聲。冇幾耐電視台有人辭職唔做,公司就畀機會我試吓,一星期一晚,報新聞同節目預告,每個月人工50蚊。」
梁舜燕續說﹕「當年藝員出鏡,冇服裝、冇化妝、冇梳頭,自己成日化到隻『丫烏』咁,咪睇書邊學邊化囉!60年,公司正式升我做全職嘅seniorannouncer(高級廣播員),送埋部電視機畀我,當年啲電視機全部係租嘅,每個月40蚊,公司咁捨得,無非想我返屋企睇吓其他節目,畀啲意見。」

相關新聞:扮尚格雲頓師母

教汪明荃森森做戲

梁舜燕由配音員做到資深報道員,又有機會拍劇和主持節目,還當上訓練班導師,她說:「第一屆訓練班好似汪明荃,森森同禢素霞我都教過。汪明荃好有天份、好有上進心,訓練班時表現已經好出色,我做佢導師呢樣嘢冇同人講過,因為佢𠵱家發展咁好,我唔想俾人誤會叨佢光啦!」
數十年來事業家庭順利,梁舜燕深信自己是最幸福的女人,直至98年底最疼錫的孻仔阮惠熊因厭食症引發肺炎病逝,令她遇上人生最大的打擊:「個仔嘅死對我真係好大打擊,當年啲人好驚我抵受唔住自殺,嗰陣我拍緊《真情》,日日入廠對住鏡頭笑,但一放工、上到城巴就忍唔住喊,喊到冇晒儀態,個心日日痛。所謂憂能傷人,結果積積埋埋兩年之後入咗醫院,醫生話醫唔到我,呢個病要我自己醫,我住咗兩個禮拜,𠵱家睇番個仔母親節送畀我嘅卡都覺得好心痛!」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載