› 選擇地區
三藩市
紐約
洛杉磯
其他美國地區
香港 台灣 北美
 
2006年09月16日

馮仁昭四圍超
田亮自認發錢寒「跳水沒意思」

戴住明星黑超嘅田亮前日到福建出席活動,睇佢笑得咁開心,就知好享受被記者包圍影相。

跳水王子田亮已經唔再喜歡泳池,眼中只有七彩繽紛嘅娛樂圈,前日佢到福建廈門出席代言手袋活動,竟然語出驚人:「我喜歡代言,有很多錢賺,跳水多沒意思,不小心摔倒多慘啊。」作為一個國家專業運動員,田亮咁嘅說話都講得出,唔怪得之國家隊領隊周繼紅曾狠批佢係壞榜樣,影響年輕隊員,馮仁昭都覺得周領隊鬧得言之有物。

相關新聞:郭富城堅持底價投AARON

耍大牌態度囂張

田亮恨做大明星恨到上腦,但每次參加宣傳活動,梗搞到𤓓事連篇。前日廣告商通知內地傳媒到福建寶龍酒店採訪田亮活動,點知田亮耍大牌,遲到早走仲態度招積。
話說當日田亮坐寶馬名車到場,同行助手一落車就對記者又鬧又推。田亮行入酒店後就好鬼滋陰咁化妝吹頭,搞足成個幾鐘。見記者前,有工作人員叫在場傳媒入會議室,話田亮本來唔願意見記者,係「畀面」大家至出嚟10分鐘,所以嚴禁問私人問題,仲兇記者話邊個敢問「就當場把他揪出去!」就連佢之後拍廣告都唔俾傳媒採訪,在場記者聽到頭頂冒煙,二話不說即拉隊走人。
𤓓事陸續有來,田亮離場冇耐先至發覺漏低手機喺發布會現場,田亮當堂嚇到魂飛魄散,好彩酒店經理發現後代佢保管,但聽聞有人曾經睇過佢部手機,入面有唔少短訊都發畀一個代號「大牌」嘅人,唔知呢位「大牌」係咪佢位明星女友葉一茜呢?
不過事後田亮就話對耍大牌傳聞感到委屈,因為主辦方面冇同佢溝通好,希望第日唔好再發生呢啲事喎。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載