› 選擇地區
三藩市
紐約
洛杉磯
其他美國地區
香港 台灣 北美
 
2006年11月26日

《恐懼鬥室3》挑釁大膽觀眾
殺人狂豬頭女玩勾皮溶骨

刀仔唔止可以鋸大樹,仲可以鋸出血,《恐懼鬥室》(SAW)一連三集,集集收得,唔單止夠恐怖血淋淋,最猛料係狂扭橋玩意外,令人大呼過癮,連日本Be@rbrick都要出埋公仔,已經唔再係小眾Cult迷口味。新作《恐懼鬥室3:死神在齒》(SawIII)美國上映以來叫好叫座,今次刁鑽恐怖陷阱層出不窮,緊張得令人腎上腺素急升,請大家做好心理準備。 撰文:戶川淳

本月30日正式在本地上映嘅《恐懼鬥室3:死神在齒》,繼續玩恐怖血腥變態扭橋同食腦,雖然成本只不過1,200萬美元(約9,369萬港元),早前美國開畫首日已經回晒本,當地累積票房已超過6,000萬美元(約4.7億港元),再次威晒,第三度證明佢係近年最成功嘅恐怖片。
睇過頭兩集嘅觀眾,都估唔到套片咁變態,第一集有刀片鐵籠、「口擘擘爆頭器」,第二集有毒氣屋、17萬支針筒池,都令人體驗一個又一個超惡毒嘅噩夢。《死神在齒》話明係升級版,殘酷怪招今次有鐵鏈勾人皮、硫酸溶手、人肉斬件,《滿清十大酷刑》都變成小兒科。

捉女醫生做手術

今集承接住上兩集劇情,殺人狂Jigsaw已經病到死死下,因為個底已經被警方起咗,所以有病唔可以光明正大睇醫生,佢惟有派出得力女助手化身做恐怖豬頭怪,捉咗女醫生全家,要佢喺限時內打開Jigsaw個頭蓋做手術。同時喺第二集慘失同僚嘅警探凱莉,同埋死咗個仔又無端端牽涉入局嘅傑夫,自保之餘仲要面對各種奪命機關,咪以為Jigsaw釘蓋就gameover,結局又再令人意想不到!

英國有觀眾嚇暈

導演DarrenLynnBousman透露,《死神在齒》比頭兩集更可怕、更暴力血腥、更有張力,同時更能牽動觀眾情緒,連佢自己都唔信一部恐怖片可以拍到咁嘅效果,難怪早前英國有四個觀眾頂唔順暈低,東英格蘭救護車服務發言人仲話:「如果你明知自己易受驚嚇,不要去看。這明顯是一套嗜血的電影。觀眾應該做好心理準備,一旦開始覺得想吐,應該盡快離場。」你又敢唔敢挑戰自己嘅膽量?

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載