› 選擇地區
三藩市
紐約
洛杉磯
其他美國地區
香港 台灣 北美
 
2006年11月26日

親密拍戲易陷情網 危!
郭晉安招供對阿佘動心

拍劇無數的郭晉安,也曾愛上女拍檔而不能自拔,不過透過自我磨煉和穩固婚姻,他現已懂得劃清界線。

藝人的感情世界,真真假假、假假真真,總是似是而非,有時候也許連當事人都混淆不清。觀眾眼中乖巧戇直的「阿旺」郭晉安,原來在感情上,都有把持不住的時刻。
安仔說:「拍每套戲,都必須鍾意對手先。」即是拍攝劇集《東方之珠》時與佘詩曼的緋聞曾經來真的?安仔竟然沒否認:「係用真感情去帶觀眾入我哋嘅世界。」
40歲前的安仔,據他形容由於荷爾蒙分泌旺盛,對於漂亮女演員感到好奇,曾失足墮入真情網,令他非常苦惱。四個月前和歐倩怡結婚後,他對做人老公責任一清二楚,從此delete戲內帶到戲外的虛擬幻象:「唔可以玩火,掂都唔掂得。」 撰文:朱倬誼

相關新聞:做多元化小生

周星馳在電影《喜劇之王》中,引用俄國戲劇理論大師史坦尼斯拉夫斯基(Stanislavski)的說法作為對白:「演戲應該從外到內、再由內反映出來。」觀眾對星爺套用這番說話也許忍俊不禁,但電視台喜劇之王阿旺郭晉安,竟是這位俄國戲劇理論大師所說的人辦。

婚後釐清界線

藝人如幻似真的感情世界,有時候會由戲外愛到戲內,再由戲內愛到戲外,即是假戲真做。
41歲的安仔明年夠資格領無綫20年「老人牌」,既然拍戲無數,跟不同漂亮女藝員在戲裏談情說愛,今年6月他和佘詩曼拍攝劇集《東方之珠》時傳出緋聞,問安仔,拍戲以來有沒有對女拍檔動過心?他坦言:「拍每套戲都必須鍾意對手先,要欣賞佢嘅性格。大家工作相處兩個幾月,會互相幫助,大家自然啲、舒服啲,出發點都係為工作,最終係會產生感情,導演嗌咗roll機之後會全情投入。」那不是等同戲假情真?他笑道:「係用真感情去帶觀眾入我哋嘅世界。」
鍾意和愛只是一步之差,安仔說現在很清晰,能夠劃清界線:「做演員要識得clarify愛同鍾意,成功藝人要磨煉出好成熟嘅心智,我明白點解要睇多啲書,係要修煉自己嘅情操。有啲年輕人會愛上自己嘅女主角,好多假象,互相愛上對方,發生感情,係好錯誤,要喺工作中磨煉自己,我已經過咗呢個磨煉階段。我有好穩定嘅婚姻生活,係一個好大嘅支柱,擺喺我感情世界嘅中心,其餘嘅只係工作。」

相關新聞:染病成就婚姻

扭曲真實生活

至於曾否愛上對手而不能自拔,安仔坦白說:「有,但結咗婚,唔講。」他頓一頓,又說:「好模糊㗎,入行時候我得20歲,到30幾歲,年輕衝動,荷爾蒙分泌最旺盛階段,好奇心一定有,對對方成個人嘅感覺,一舉手一投足,整個身體,拍戲時同對方好親密,係可以想像到好危險,掌握唔到自己情緒會好難受。」
安仔續說:「但唔可以玩火,掂都唔掂得,諗番以前嘅經歷,真係有影響成個製作。拍劇時鍾意佢,互相發生感情,劇情有談情說愛,有分手時刻,有高有低,有第三者介入,現實生活你兩個真係拍緊拖,唔多唔少會有唔好嘅感覺。劇情分手時,你兩個會唔鍾意,要嗌交喎,吓?兩個咁sweet嗌交?心情上會有抗拒,於是將自己嘅生活慢慢扭曲,對自己冇好處,會一路建立唔健康嘅感情世界。其實係學問,對藝人都係幾慘嘅一樣嘢。我愈嚟愈體會演員係工具,點將一個戲假情真嘅虛擬世界,帶去現實世界中觸動人。」
不過,都要郭太歐倩怡給予同步信心,否則會帶來很多誤會,安仔說:「佢接受呢套講法,我哋嘅感情世界好深層,唔會俾人動搖到,我哋唔會花時間去揣測對方。」

不避嫌讚阿佘

和阿佘傳緋聞後,安仔說當時大家拍戲並沒尷尬,他對阿佘始終有讚冇彈:「上一次同阿佘合作係02年拍《情牽百子櫃》,嘩,犀利,佢比起《情牽》時誇張囉。佢古裝又拍、民初又拍、時裝又拍,幾亂㗎,係好靠演員嘅觸覺,佢拿揑得好好。《火舞黃沙》做村姑,識得用手抹鼻涕;《鳳凰四重奏》做四個角色,好似精神分裂,唔容易做㗎,直到𠵱家嘅《東方之珠》,形容佢識飛。環顧咁多女主角,佢入行就10年,不嬲唔多出聲,但做咗好多嘢,到𠵱家心態成熟咗。
「佢拍《東方之珠》時有好多頭飾、耳環、衫,要執得好四正,整個髮型都要搞好耐。𠵱家佢明白出鏡嘅都係自己;以前拍《情牽》時,佢冇所謂,話唔好滾搞人,但觀眾係睇你一個,唔執得四正,蝕底係自己。點解啲人會話呢個演員咁奄尖、咁麻煩,呢啲係應該㗎。」
攝影:陳俊強
協力:羅慧敏
服裝:agnesb
場地:霞飛路上海料理

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載