› 選擇地區
三藩市
紐約
洛杉磯
其他美國地區
香港 台灣 北美
 
2006年11月26日

唱爆飲歌──藝人唱K的飲歌

鄭融

鄭融力撐好友

「我最鍾意嘅歌係我好朋友薛凱琪嘅《886》,因為我好鍾意唱快歌,首歌節奏好好,每次唱完呢隻歌之後,都帶動成個卡拉OK嘅氣氛,之後成班朋友都會起晒身跳舞,搞到成個卡拉OK都會變成勁歌熱舞嘅舞池咁。」
飲歌之選:薛凱琪《886》

周家蔚聽到識唱

「我最鍾意唱張惠妹嘅《解脫》,以前喺加拿大讀書成日都會喺車聽呢隻歌,由於對呢首歌太熟悉,所以去到卡拉OK好自然會識唱,覺得呢首歌嘅旋律好好聽,張惠妹嘅歌都幾難唱,我唔係首首都唱到,偏偏呢首就唱到,所以好有滿足感。」
飲歌之選:張惠妹《解脫》

何韻詩氣勢磅礡

「唔一定去卡拉OK先唱歌,我係屋企或者平時最想哼同唱嘅飲歌就葉麗儀嘅《上海灘》,呢首歌由細聽到大,而且仲好深入民心,只要見到葉麗儀就會諗起《上海灘》,加上呢首歌係由兩位頂級創作人顧嘉煇同黃霑合力之作,真係好犀利,一開頭已經氣勢磅礡,所以我周不時會拎呢首歌嚟練氣。」
飲歌之選:葉麗儀《上海灘》

安德尊着重氣氛

「其實我好少去唱K,因為都擔心嗰啲地方會太雜,以前去唱K最鍾意唱李克勤嘅歌,特別係每次都會唱嗰首《月半小夜曲》,首歌克勤又唱得好,歌曲嘅氣氛又好,最緊要係自己又唱到,所以次次都會揀呢首歌嚟唱。」
飲歌之選:李克勤《月半小夜曲》

鄭嘉穎自認咪霸

「以前我會唱校長譚詠麟同張學友嘅歌,當中特別鍾意唱學友嘅《李香蘭》,𠵱家去唱K就唔會特別揀唱邊位歌手嘅歌,總之嗰期有乜嘢hit歌我都會唱,抱住開心玩嘅心態。我都算係朋友中嘅咪霸,可以成晚拎住支咪不停咁點歌唱歌,唔會攰,唱歌係我本身嘅興趣,唱K可以放鬆心情,又可以練吓歌。」
飲歌之選:張學友《李香蘭》

葛民輝化作畫面

「我幾乎冇去過卡拉OK,最近嗰次係噚日去過,我好多時唱歌都唔記得歌詞,如果我要記歌詞就會將佢哋化為畫面,咁樣我先至會記得,我又唔識幾時開始唱,次次都係阿Jan(林海峰)提我,𠵱家最叻就係唱陳奕迅嘅《最佳損友》,因為表演時唱過嘛﹗」
飲歌之選:陳奕迅《最佳損友》

黃貫中聽落有味

「我自己極少去卡拉OK,揀歌都係睇心情,不過,如果要嚴選當然係學友嘅歌,好似《分手總要在雨天》呢啲比較舊嘅歌,聽落特別有味道,除咗一啲近年較為新嘅歌,我唔係好記得歌詞之外,其餘學友嘅歌,我都會揀嚟唱。」
飲歌之選:張學友《分手總要在雨天》

古巨基借機操聲

「其實我唔多去卡拉OK唱歌,但係我每次去都例必會唱王菲嘅歌,基本上王菲所有歌我都會唱,當中要講最鍾意就係《給自己的情書》,其實如果我唔唱自己嘅歌時,就最鍾意唱女仔嘅歌,因為以男仔角度去唱個感覺係好唔同,最重要係向難度挑戰,始終女仔歌會比男仔歌高音好多,可以借機練吓歌喉囉。」
飲歌之選:王菲《給自己的情書》
採訪:駱華齡、張俊銘、卓美娟

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載