› 選擇地區
三藩市
紐約
洛杉磯
其他美國地區
香港 台灣 北美
 
2007年01月22日

繪畫行善賀出山
Sammi「冇興趣同千嬅爭」

鄭秀文昨日滿面笑容地跪在親手繪畫的作品前,看來十分滿意。

正當楊千嬅和何韻詩力爭東亞一姐之位時,一直養尊處優的鄭秀文昨日終於出山加入戰團,首要任務是出席慈善活動,更親手畫畫大騷才華,似向大家展示她除了能歌擅舞及拍電影外,繪畫方面也有水準,不過她揚言冇興趣同千嬅爭,難道不放對方在眼內?

鄭秀文(Sammi)自拍完《長恨歌》後,有指她因健康欠佳而勁減工作量,縱然簽約東亞已有一段日子,但她一直推掉工作,遲遲未見露面,不過楊千嬅加盟東亞之後,即傳出Sammi出山爭做一姐,而她昨日終正式投入工作,以醫院榮譽大使身分,出席在跑馬地馬場舉行的「愛拼大行動」記者會,並親手畫了一幅畫,聯同千名病友、義工及藝術工作者所繪的圖畫合拼成全球最大的巨畫,以喚醒世人的關愛精神,Sammi說:「呢個活動好有意義,係今年第一份工作,用咗幾個星期去畫,呢幅畫我好滿意。」

5月開個唱

對於是否會全力投入工作,Sammi強調要以輕鬆無壓力為主,她說:「唔會好密集去工作,5月會開演唱會,暫定4至5場,到時體力充沛咪開多啲,唱片應該唔會出,最多出幾首單曲嘅CD,暫時都唔想令自己太辛苦,健康同快樂好重要,我想開心工作,唔會畀自己太大壓力,歌迷渴就叫佢哋飲水啦!」
有指因楊千嬅加盟,故Sammi出山爭做一姐,對此她說:「唔該,求吓你哋放過我啦!我冇興趣同冇需要咁做,我鍾意開心同跟自己意願去做嘢,娛樂新聞報道話公司畀幾多錢我做嘢,我嘅合約係另一回事,同林生(林建岳)係好free嘅協議,佢係生意人,點會畀好多錢我又唔使做,根本冇可能,我衷心希望千嬅去到新公司積極去做,有好發展,佢(楊千嬅)咁樣我睇到都會好開心,爭乜嘢最佳女歌手,我冇玩呢個好耐啦!都已經習慣被人拎我同千嬅比較,我哋做嘢會見到面,但唔多接觸機會。」

未有追求者

提到感情方面,Sammi稱會將此方面交給神去安排,她說:「好似冇追求者,畀神安排得㗎啦!到時派紅雞蛋唔會漏咗你哋,𠵱家咪亁等囉!」Sammi在活動結束後,往銅鑼灣新寧道一間花店cafe接受陳輝陽訪問。
採訪、攝影:魯萍、陳偉權、娛樂突發組

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載