蘋果日報 | APPLE DAILY
› 選擇地區
三藩市
紐約
洛杉磯
其他美國地區
2007年03月23日

黃金視窗:蔡少芬以色列背十字架跨過人生苦路

背上十字架的蔡少芬,邊行邊想到當日耶穌走過這條路的情景,十字架便變得更沉重。

以色列向來被視為基督教、猶太教及回教聖地,是最接近神的地方,全球逾35億信徒畢生最大的心願,就是往以色列朝聖,蔡少芬便是其中之一。朝聖之旅中,她背上80磅重的十字架走上耶穌步過的苦路,曾經被指獲劉鑾雄照顧、與爛賭母親反目的蔡少芬,在其人生苦路上,曾因厭惡自己意圖自殺,為18歲百萬生日會備受批評而耿耿於懷,但今日的她,早已透過祈禱放低心中的包袱。

相關新聞:話你知:苦路送別耶穌

由於政局動盪,蔡少芬到以色列拍攝《向世界出發》曾三度改期,故終於能踏足聖城的一刻,蔡少芬心中充滿興奮與感動。今次朝聖之旅,蔡少芬走遍耶穌出生地伯利恆、聖殿山、受洗的約旦河、最後晚餐原址、受難和復活的耶路撒冷,還站在哭牆下禱告,甚至背上80磅重的十字架,親身感受耶穌被釘十字架前所走的最後一段苦路。

曾經意圖自殺

蔡少芬說:「據講當年耶穌孭嘅十字架有160磅重,我孭呢個已經覺得好重,每一步我都行得好辛苦,而且咁重好容易失去平衡,當年羅馬士兵仲用皮鞭虐打耶穌,向佢吐口水,周圍嘅人不停出言侮辱嘲笑耶穌,當我一邊行一邊想到當日嘅情景,十字架就會變得更加沉重。」
蔡少芬走過耶穌的苦路,也走過自己人生的苦路。91年奪得港姐季軍後,蔡少芬即獲無綫力捧,外界以為集萬千寵愛於一身的她應該很快樂,其實那段日子卻是她最痛苦的時刻,她說:「喺呢行入面打滾,我好驚人哋傷害自己,又因為自卑,我會成日都戴個假面具對人,開唔開心都對住人笑,結果俾人話我世界女。拍戲人哋覺得我得個樣,成日做人情婦,令人對我有一個好差嘅印象,再加埋我嗰時一出道有一個乜嘢大型生日會,啲人只會覺得蔡少芬係一個好虛榮嘅女仔。」
蔡少芬續說:「嗰段時間好難受好辛苦,去到95年我實在頂唔順,屋企人唔明白我,我冇人錫,好孤單,冇生存意義,我好想了結自己生命,而我真係有去咁樣做,但我突然聽到有聲音話:『你唔要嘅嘢畀番我啦。』我自己都睇唔起自己,點解你仲會要?令我好感動。」

相關新聞:話你知:哭牆哀悼亡國

祈禱放低心結

提到18歲的百萬生日派對,蔡少芬說:「屋企幫我搞個好大型嘅生日會,但feedback好差,因為咁啱華東水災,啲人話點解唔拎啲錢去賑災,嗰陣好唔開心,一有人提起,我就覺得係侮辱我、踐踏我,但我祈禱嘅時候問番自己,點解要唔開心?跟住我會覺得,嗰件其實唔係一件光彩嘅事,所以唔開心,有個聲音同自己講:『你要面對,因為呢個係你嘅過去,冇得抹走嘅,你要接納。』有好多睇唔見嘅垃圾喺我生命裏面,我𠵱家仲清理緊,過程會辛苦流淚,但只要得到屋企體諒,幫手一齊處理問題,大家手拖住手,應該可以克服到所有困難嘅。」
撰文:戴彩煥

《向世界出發》蔡少芬「以色列的苦路」單元將於下周一晚10:35pm於翡翠台播出。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載