蘋果日報 | APPLE DAILY
› 選擇地區
三藩市
紐約
洛杉磯
其他美國地區
2007年04月17日

IQ成熟人面全非
那時那地那人:鄧藹霖痛惜鍾保羅、蔡楓華

《IQ成熟時》四位主角(左起)鍾保羅、鄧藹霖、莊靜而和蔡楓華,一度是年輕人熱捧偶像。

亞視近日下午重播經典劇《IQ成熟時》,不僅勾起觀眾集體回憶,更令當年有份主演的港台DJ鄧藹霖和鄧慧詩百般感慨。這部她們唯一僅有的劇集,當年一推出已贏得超過五成觀眾收看,撼贏無綫,寫下歷史性一頁,更掀起賣相熱潮。但驀然回首,鍾保羅、吳回、良鳴和李燕萍等多位劇中演員已相繼離世,相交多年的蔡楓華也落得今日癲癲狂狂,最令她們惋惜和心痛。 撰文:戴彩煥

相關新聞:話你知:星爺茄喱啡收保護費

港台DJ出身的鄧藹霖,81年在施南生邀請下參與麗的(亞視前身)劇集《IQ成熟時》演出,首次拍劇便有機會擔正做主角,跟同是港台DJ出身的鄧慧詩拗手瓜力爭鍾保羅,而她這個第一次,更成為麗的的第一次──收視超越無綫。
日前記者請來鄧藹霖和鄧慧詩在港台錄音室一起細味她們的威水史,鄧藹霖說:「啲人初初唔係咁睇好,因為全部都係新人,點知出街第一個禮拜,監製梁天話要搞慶功宴,原來我哋收視贏咗無綫嘅《荳芽夢》,有50幾點,超過一半觀眾(即逾五成觀眾收看),係一個歷史,以前從未試過!之前《大地恩情》成績雖然好好,但未至於超過TVB,所以大家都好開心。」

拍劇險送生命

《IQ》不但創佳績,更開創賣明星相先河。鄧藹霖透露,當年劇集大收,連帶幾位主角的相片也在旺角賣相舖賣得成行成市,位列銷量榜榜首。
鄧藹霖拍完《IQ》後未有繼續幕前演出,因為她發覺自己完全不適應日以繼夜趕拍的日子,更重要的是一次死過翻生的經歷。她說:「有場戲係拍我同莊靜而以及成班人去石澳燒嘢食,導演叫我哋坐晒上去部開篷Jeep度拍大wideshot,我坐最後角落個位,點知部車轉彎時仲加速,成車人fing咗出去。佢哋搵番我嘅時候,我喺嚿大石隔籬昏迷咗,如果再fing過啲撞落大石度,我就死咗喇。當年新聞報道話我交通意外危殆,個頭穿咗要縫針,喺瑪麗住咗成個禮拜,莊靜而都整損手腳……我第一次拍劇就係咁驚咗。」
鄧慧詩也表示該劇自開拍以來意外頻生,鍾保羅更試過被車輾過腳掌,她說:「鍾保羅腳掌壓到碎晒,佢仲講笑咁話每隻腳趾要用鐵嚟撐住,一聽就好驚。」問她何以未有繼續幕前工作?她說:「我仲讀緊書,嗰幾個月折磨得我好緊要,有啲導演唔鍾意遷就你時間,成日畀說話你聽,同埋我始終覺得電台工作適合啲。」

懷念已故友人

創收視佳績、創賣相銷量,鄧慧詩和鄧藹霖固然回味無窮,但最懷念的,還是劇中多位已先後離世的知己前輩,鄧慧詩感慨地說:「好欷歔,有好多位演員已經唔喺度,好似鍾保羅咁(還有良鳴、吳回及李燕萍等),蔡楓華狀態又唔係幾好,有啲又失晒蹤唔知去咗邊!」
對於鍾保羅和蔡楓華兩位《IQ》男主角的際遇,鄧藹霖和鄧慧詩深感痛惜,特別是蔡楓華,鄧藹霖早在79年已跟他合作主持《香蕉船》,又是多年港台同事,鄧藹霖說:「以前佢成日喺我隔籬𠵱𠵱哦哦,怨呢個鬧嗰個,我好𤷪咁話佢:『個個咁錫你咁捧你,你係天之驕子,咁都唔珍惜?』佢話:『嗰個人真係對我唔好,佢倔住我針對我!』我話人哋邊有倔住你啫,人哋根本冇望你!不過我好欣賞佢一樣嘢,就係佢好真,由佢入行一刻對住你都係講真話,從來唔會修飾,所以撞唔少板。」

望蔡楓華振作

當日的白馬王子,變成今日的「癲王」,幸而鄧藹霖近日從友人口中得知蔡楓華現正接受治療,人已變得清醒,她謂希望對方完全康復後更加自愛自重,重新振作起來。
已是兩子之母的鄧藹霖,97年離開港台後做全職主婦,至01年重返港台主持親子節目《訴心事家庭》;至於早年跟丈夫離婚的鄧慧詩,育有一兒子,現時她除與友人合資開公關公司外,更為港台主持逢星期二晚的《恬淡情懷》節目。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載