蘋果日報 | APPLE DAILY
› 選擇地區
三藩市
紐約
洛杉磯
其他美國地區
2007年05月22日

娛樂怪史:陳小韻偷內褲人贓並獲

陳小韻當年偷內褲罪成,被判罰款三千蚊,佢離開法庭時全程黑臉。

時間:99年6月1日

人物:陳小韻

地點:銅鑼灣馬莎百貨

經過:章小蕙舊愛「白頭陳」陳曜旻嘅愛女陳小韻,99年6月獨自行銅鑼灣時代廣場嘅馬莎百貨,佢當時諗住買行騷着嘅內褲,點知上演一幕買嘢唔畀錢,搞到俾馬莎嘅保安人贓並獲。陳小韻被判偷內褲罪成,罰款3,000蚊。
陳小韻嗰日選購內褲,佢畀錢買咗一條,不過事後俾保安喺佢手袋搜出8條冇畀錢嘅內褲,價值700幾蚊。陳小韻上庭自辯時話:「我有攞起啲嘢,但因為顧住講電話,係男友(黃家諾)打嚟,男友話好快要返美國,我當時心情好差,由於我當時講電話好專心,所以唔知自己做緊乜。」佢仲話:「每個月媽咪畀7,000蚊零用錢我,我都有爹哋嘅附屬信用卡。」陳小韻希望用呢個理由向裁判官解釋冇心偷嘢,可惜裁判官指佢嘅辯解唔可信又唔可靠,疑點重重,加上控方有便衣保安目擊陳小韻偷竊經過,裁判官認為保安誠實可靠。拘捕陳小韻嘅警員都指出,陳小韻當日作供時話:「我一時貪心先偷嘢,畀我一次機會。」
陳小韻出庭當日,雖然咁大件事,但男友黃家諾都冇陪喺佢身邊支持,佢哋兩個事後仲好快玩完㖭。陳小韻近年全職做模特兒,不過好少露面。
本欄逢周一至周六刊出

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載