蘋果日報 | APPLE DAILY
› 選擇地區
三藩市
紐約
洛杉磯
其他美國地區
2007年05月24日

娛樂怪史:麥家琪爆裸照輸港姐

麥家琪93年參選時係大熱門嚟㗎,不過傳出拍過露點照之後,連五強都入唔到!
《壹本便利》圖片

時間:93年6月

活動:港姐選舉

人物:麥家琪

經過:93年只有17歲嘅麥家琪參加香港小姐選舉,本來樣靚身材正嘅佢都好有機會攞獎,當年仲係熱門人選,不過喺賽前就傳出麥家琪曾經拍過露點寫真,結果決賽夜,麥家琪大熱倒灶,連最後五強都唔入,由莫可欣攞咗冠軍,亞軍林麗薇,季軍係余少寶。
不過當晚就有個小插曲,當司儀宣佈最後五強時,電視螢幕明明係打咗麥家琪個名出嚟,不過司儀就宣佈咗余少寶,呢個小錯誤令傳聞四起,有人就聯想到同麥家琪被傳拍艷照有關,事後無綫梗係例牌否認。
選美結束後,真係有批麥家琪嘅性感相俾雜誌登咗出嚟,麥家琪本人就堅決否認係相中人,佢仲話:「呢個時候,我激動都無補於事,睇過照片,自己都覺得同相中人樣貌確有幾分相似,但身形就自問唔及。」麥家琪仲話會採取法律行動,結果佢爹哋就向高院申請禁制令,阻止嗰批相再刊登。
麥家琪雖然失落港姐,不過之後佢仲憑住性感形象打入電影圈,不過舊年同大律師男友王國豪結婚之後,佢就收起性感喇,早排佢仲承認有咗BB,10月會做媽咪㖭,唔知佢到時會唔會同BB影番輯寫真留個紀念呢?
本欄逢周一至周六刊出

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載