› 選擇地區
三藩市
紐約
洛杉磯
其他美國地區
香港 台灣 北美
 
2007年05月29日

那時那地那人:黎小田錯配15歲細契

82年黎小田與關菊英結束八年愛情長跑,攜手同行人生路,可惜兩人同行的日子,只得兩年。

無綫劇集《溏心風暴》近日掀起熱潮,劇中飾演細契的關菊英更是人氣急升,除了令她成為狗仔隊追訪目標外,連帶她與前夫黎小田那段早已埋葬的婚姻亦再度出土。自言甚少看電視的黎小田表示也有留意前妻的演出,更大讚對方演技精湛。 撰文:卓美娟

相關新聞:人物誌:演藝世家 5歲入行

黎小田與關菊英早於73年已認識,當時只有15歲的關菊英已令黎小田為之神魂顛倒,黎小田說:「佢十幾歲我已經識佢,73年我參加無綫舉辦嘅流行歌曲創作比賽得到季軍,得獎歌曲《痴心等待你》就係由佢演繹,當時已經追緊佢㗎啦!大家後來都拍咗8年拖先結婚。」

結婚筵開百席

黎小田在82年與比他年輕12載的關菊英結婚,二人結束8年愛情長跑,婚禮當晚筵開百席宴請親友,不過婚後兩年卻閃電離婚。他說:「拍拖同結婚係好唔同嘅,兩個人雖然拍咗咁耐拖,不過到要共同建立一個家,一齊生活,其實有好多嘢要適應,再加上大家嘅性格都好主觀,我以前都好招積㗎,唔係好似𠵱家咁。」
關菊英近期憑《溏心風暴》扮演細契勇闖事業第二個高峯,黎小田亦大讚前妻演技精湛,他說:「細契好嘢,我有睇過套劇,不過唔係日日追,佢以前都有拍劇,不過𠵱家成熟咗,點解年紀大咗嘅人會更識做戲呢,我諗係見得世面多,經歷多咗,自然input都多咗,佢真係做得好好。」

代關菊英闢謠

黎小田與關菊英在20多年前離婚,至今二人仍是單身,不過早前關菊英在訪問中表示仍有一顆恨嫁心,對未來仍充滿憧憬。問黎小田可會考慮再婚?他說:「我自由慣,無拘無束幾好,有另一半要負責任㗎,已經離過一次婚,再結婚唔好啦!係你哋話我多緋聞啫,我成六張嘢,都係拍過五、六次拖,邊算多呀!」
對於近日有傳聞指關菊英多年前曾被張耀榮照顧,黎小田就表示不會相信這傳聞,他說:「佢本性好好,不過遇到我呢個浪子啫,呢啲傳聞我諗唔會係真,佢都好有格調㗎,可能係佢契媽琴姐同狄波拉成日都有同張耀榮打牌,大家誤會囉!」
黎小田在本港流行樂壇早就享負盛名,他創作的名曲多不勝數,包括《你令我快樂過》、《人在旅途灑淚時》、《儂本多情》、《問我》等歌曲,去年更獲香港作曲家及作詞家協會(CASH)頒發「CASH音樂成就大獎」,歷年作品超過660首。
黎小田在80年代從麗的電視過檔至華星唱片,當年更一手捧紅張國榮、梅艷芳等樂壇天王天后,他說:「一過華星就有搞新秀歌唱比賽嘅意念,我諗香港𠵱家起碼有八成嘅歌手都參加過新秀。」
提起80年代男歌手當中,以譚詠麟及張國榮之間的競爭最為激烈,有一段頗長時間張國榮都是屈居於譚詠麟之下,作為當時張國榮唱片監製的他,被問到可有感到不值,黎小田說:「當時哥哥都有問我㗎,我覺得阿倫係比較大眾化啲,做人亦都圓滑啲,哥哥就比較cool,有文化修養,好多嘢佢唔會去解釋,你唔識就唔識,唔使講咁多,哥哥同陳百強係同一類,好官仔性格。我當時都有同佢講,你有你風格,冇可能每一個人都鍾意你,佢早期唱法同後期嘅華星都已經好唔同,佢同我都喺外國受教育返嚟,我覺得佢把聲壓沉咗唱,好似貓王咁,會比較sexy,可以用英文歌唱法去唱廣東歌。」

阿梅天生慘情

至於另一位經他發掘及捧紅的梅艷芳,黎小田就表示處理手法截然不同,他說:「佢冇哥哥嘅教育程度咁高,揀畀佢嘅歌要好慘情,佢紅親嘅歌全部要唱到死唔斷氣咁,全部都係傷感歌,可能同佢自小喺荔園唱歌呢啲背境有關,大家都覺得佢好滄桑。」
黎小田近年與友人合資在跑馬地及中環開設酒吧,10月會在紅館舉行音樂會,他說:「咁多年嚟都作咗好多作品,希望可以同大家一齊回顧吓,已經邀請咗陶傑做司儀。」
本欄逢周二刊出

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載