蘋果日報 | APPLE DAILY
› 選擇地區
三藩市
紐約
洛杉磯
其他美國地區
2007年07月03日
馬上成為壹會員

「我以前做正經戲」
那時那地那人:馮淬帆唾棄港產搞笑片

馮淬帆雖然演過無數經典搞笑片,但現實中的他卻是個比較嚴肅和不苟言笑的人。 攝影:林德雄

馮淬帆1965年加盟麗的映聲(亞視前身)做男主角,由最初現場演話劇,到過檔無綫後由黑白電視跳到彩色年代擔正做男主角,馮淬帆見證了電視行業每一個歷史性時刻,但對香港觀眾而言,最深刻的還是80年代他一系列的搞笑電影。不過,這些經典笑片,對馮淬帆卻是一大遺憾,因為這些笑片令他被定了型,令他的真正演技全被人忘得一亁二淨! 撰文:戴彩煥

不論《奇謀妙計五福星》的蘭克司(《夏日福星》中飾犀牛皮),抑或《精裝追女仔》的劉定堅,馮淬帆雖然不苟言笑一臉冷傲,卻製造出爆笑效果,而這些等同近年周星馳笑片般受歡迎的電影,曾幾何時也令馮淬帆笑到失控。

嫌港產片冇深度

馮淬帆日前接受專訪時說:「拍《五福星》時成日NG,因為個個輪住忍唔住笑,到5個人一齊忍到笑,都已經拍咗幾十次。全世界忍唔到笑其實好正常,如果現場都笑到咁樣,套戲一定好收,如果拍戲連自己都唔笑,觀眾又點會笑?《五福星》有場戲講我哋俾班潮州佬圍住,叫我哋講句潮州話嚟聽吓,曾志偉就話『些funk易呢funk(seveneleven)』,呢句笑到我仆街,但呢啲笑話好香港式,去到第度啲人會:『超!些funk易呢funk,有乜咁好笑!』」
雖說這一系列搞笑電影令馮淬帆笑到失控,但原來沒有一部他是喜歡的,他說:「呢啲戲我冇可能鍾意,平時自己亦唔會去睇,因為我最唔欣賞好多港產片冇乜思維,太過香港化,呢類香港戲出咗去第二度,人哋都唔知你講乜,啲對白配埋國語之後完全唔係嗰回事!」

為五斗米拍笑片

馮淬帆坦言自己是為了五斗米才狂接這些自己從不喜歡的笑片,至於當年何以被發掘做笑匠,馮淬帆也不明所以:「我都唔知點解!對我嚟講其實係一個好大遺憾,啲人將我打咗落去做喜劇,其實我唔係咁鍾意,點解佢哋唔記得我以前都係做正經戲?不過,人哋搵到我,我又唔會拒絕,搵錢吖嘛。其實我𠵱家一路喺內地、台灣都係拍緊啲正經戲,自己又做導演又做演員,只不過啲戲冇喺香港上之嘛。」
除了在內地又演又導之外,馮淬帆偶爾也會在港產片中客串演出,如近日陳奕迅和楊千嬅主演的《每當變幻時》中,他便飾演千嬅的父親。
70年代是許冠文和許冠傑《最佳拍檔》系列天下,80年代是馮淬帆《五福星》及《追女仔》系列,90年代則是周星馳無厘頭笑片天下,問對於周星馳這位後輩有何評價時,馮淬帆竟顯得十分為難:「你叫我點講啫!我一定要話好好睇咁呀?我都冇乜睇過佢啲戲,不願置評。我真係唔係好鍾意搞笑戲,我欣賞喜劇,但唔係搞笑。」馮淬帆表示,他喜歡史提夫馬田(SteveMartin)演的喜劇,或是茱莉亞羅拔絲的《MyBestFriend'sWedding》之類的電影,喜歡他們夠自然。

日夜顛倒頭撞牆

60、70年代,幾乎佔半數電視劇集也是馮淬帆擔正做男主角,問到當年拍劇趣事,馮淬帆笑說:「以前麗的映聲演話劇係做live,唔係錄影,當年我演一部好似偵探片嘅《電視法庭》,后叔(陳有后)做法官,但法官一路係冇嘢講㗎嘛,結果等到最後佢判案嗰陣,佢竟然瞓着咗。」當然,70年代為無綫日夜趕戲的日子,馮淬帆亦絕對忘不了:「我試過行路仆親撞埋牆啦,因為冇覺好瞓!嗰時我係主角,梗係戲份多,日日07到26(早上7時至翌日凌晨2時),返到屋企沖埋涼,日日瞓得3、4個鐘頭,嗰時我住廣播道,有日行路返TVB(廣播道舊址)開工,行行吓撞埋牆都唔知!」
今日大家見到的馮淬帆,並不是一開始便是二撇雞,60、70年代的他,樣子還是「青靚白淨」,談到他80年代開始「轉型」,原來背後有個蠻有趣的故事,他說:「我好後生已經想留鬚,但俾阿媽鬧,佢唔鍾意我留鬚,咁我咪唔留囉,後來我爸爸過身,咁我就有藉口啦,古人喺上一輩過身後,係一路唔剃鬚守孝,過咗一段時間先至剃,但我就乘機唔剃囉!」

人物誌:《執到寶》奠地位

現年62歲的馮淬帆暱稱阿緊,父親為粵劇伶人馮鏡華,中學已在學界演話劇攞獎,65年加盟麗的映聲,主演過幾部劇集後獲楚原邀拍首部電影《黑玫瑰之三之紅花俠盜》,68年加盟無綫,演過《夢斷情天》、《執到寶》及《飛越十八層》等劇,深入民心。
83年演出電影《奇謀妙計五福星》大收後,拍攝了一系列《五福星》片,至87年《精裝追女仔》再創佳績後,又演出一系列《追女仔》電影。馮淬帆先後擔任電視和電影編劇導演,約20年前到台灣定居後仍繼續演藝工作。感情生活方面,81年與曾慶瑜合作《烽火飛花》時相戀,拍拖2年便分手收場,至今仍是單身漢。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載