› 選擇地區
三藩市
紐約
洛杉磯
其他美國地區
香港 台灣 北美
 
2007年08月19日

《歲月》奸國舅臨門撻Q
陳國邦、羅敏莊取消婚禮

陳國邦前晚陪羅敏莊睇HelloKitty騷,看男方表情,已知他對HelloKitty興趣不大。

在《歲月風雲》中飾演奸國舅的陳國邦,原本訂好酒席在下月初與拍拖五年的女友羅敏莊拉埋天窗,但臨門一腳,二人突然取消婚禮,幸好兩口子並非感情亮紅燈,只是他們舉行婚宴的場地,因違反消防條例未能如期開業,才迫使他們取消婚宴,陳國邦昨日表示要等到明年才能迎娶女友。

無綫劇集《歲月風雲》雖然收視未見突出,但身為劇中四大奸人之一的陳國邦演技卻備受讚賞,就連劇中演他胞姊汪紹芬的鄧萃雯,早前接受本報專訪時,也大讚陳國邦演技出色,雯女更不時傳短訊鼓勵好弟弟說:「有付出過努力,一定會有人睇到。」對一直默默耕耘的陳國邦而言,總算有點安慰。

擺酒場地出問題

現年39歲的陳國邦,與32歲的女友羅敏莊02年因合作劇集《雲海玉弓緣》而擦出愛火,二人拍拖五年,原本準備在下月初擺酒結婚,並一早訂好酒席,豈料兩口子月前接獲通知,指擺酒場地出現問題,迫使二人取消下月的婚宴。
陳國邦昨日接受電話訪問時說:「我同Mimi(羅敏莊)一早睇中咗九龍灣國際展貿中心一個結婚場地,仲畀晒訂金,準備下個月初擺酒結婚,點知後來有關方面打電話畀我哋,話個場地唔符合消防條例,要改圖則,然後要入則,再拆過裝修過,等個場開番嘅話,起碼要等到下年。」

「個場開番先結」

記者問何不另覓婚宴場地時,陳國邦解釋說:「其實佢哋都提供咗另外兩個場地畀我哋選擇,但我同Mimi一直冇時間去睇。其實佢哋亦都有話賠償番畀我哋,但我哋冇攞到,因為佢哋畀番好多優惠我哋呢班受影響嘅人,好似之前我哋book嗰個時間唔係旺季,所以價錢會優惠啲,如果遲啲佢哋開番嘅話,除咗畀優先權我哋揀日子之外,仲會照番之前個優惠價畀我哋,既然我同Mimi又唔係唔結婚,不如等個場開番先至結囉!」
陳國邦續說:「我原本訂咗擺幾十圍,一早通知晒班親戚朋友下個月結婚,後來我哋取消婚禮,好多朋友都好關心我哋,以為發生乜嘢事,搞到我哋要逐一打電話同佢哋解釋係場地出咗問題。」
此外,身為HelloKittyfans的羅敏莊,前晚偕同陳國邦到浸會大學會堂欣賞「HelloKitty夢幻音樂之旅」,羅敏莊一到場即一支箭地衝上前跟HelloKitty公仔合照,一副童心未泯模樣。
採訪、攝影:戴彩煥、王連連

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載