蘋果日報 | APPLE DAILY
› 選擇地區
三藩市
紐約
洛杉磯
其他美國地區
2007年09月15日

嘆9歲神童錯過童真快樂
那時那地那人:辛尼哥哥永遠跳飛機

辛尼哥哥重拾童真跳飛機,細味着跟一班飛機仔飛機女的開心往事。 攝影:陳慧安

由跳飛機到遊戲機,孩童玩意引證時代不斷演變,但辛尼哥哥(黃汝燊)與《跳飛機》一班小朋友的經典兒歌,至今依然世代相傳。70年代陪伴大家走過淳樸童年的辛尼哥哥,今日雖然不再年輕,但依然為小朋友培育工作而努力。他說:「雖然金錢同物質上我好貧窮,但心靈上好富足。」 撰文:戴彩煥

跳飛機不僅是兒時玩意,更是70年代小朋友最愛的兒童節目,當年辛尼哥哥擔任主持,又教一班飛機仔飛機女做戲唱歌仔,小演員鬧情緒,他更要想盡辦法安撫,樣樣要兼顧。
回看當年,辛尼哥哥感慨地說:「雖然嗰陣小朋友玩意唔多,只係拍公仔紙、玩橡筋繩、跳飛機,但生活一樣滿足,因為呢啲遊戲拉近咗人與人之間距離,鄰舍關係同友情好濃厚,溝通好好,今日雖然時代進步,但小朋友一放學就返屋企打遊戲機,人與人之間變得好生疏。」

談改變兒歌淪為捧人手段

昔日無綫花了不少資源製作兒童節目,有顧嘉煇作曲、黃霑及鄭國江填詞,每個學期開始,無綫會把節目給校長老師看試片,真真正正為小朋友度身訂做,但時移勢易,辛尼哥哥慨嘆一切已今非昔比。
「早排出席兒歌頒獎禮,一位幕後話好欣賞以前我為小朋友做嘅一切,佢話𠵱家小朋友節目唔係小朋友節目,兒歌唔係兒歌,冇晒社會責任,只為捧紅某個藝人。好多主持只係視兒童節目為踏腳石,但我真係好喜歡小朋友,唔係扮演緊一個角色。以前小朋友做節目,無論畀幾多錢都係父母收,佢哋係嚟玩同enjoy,所以絕唔能夠勞役佢哋,當佢哋冇情緒,我會叫導演停機,然後買雞翼汽水畀佢哋。嗰位幕後話今日經已好唔同,因為錄影廠時間緊迫,拍唔完就算數。」

惜童真莫生唱情歌唔正常

辛尼哥哥覺得今日的兒童節目只是大人認為小朋友需要甚麼,而不是小朋友真正需要甚麼,他說:「你畀小朋友白麵粉,佢咪做白麵包,畀佢黑麵粉咪做黑麵包,你畀嘅可能合潮流,但未必合佢哋年紀或智慧。𠵱家啲主持語氣口脗,由周星馳年代開始,又打人又鬧人,根本唔係一個典範,小朋友會有樣學樣,以前我哋好小心處理。𠵱家啲小朋友不論講話抑或身體語言都變得好成熟,好似嗰位莫生(莫凱謙),小小年紀唱情歌,你話正常?我又唔覺。」
9歲神童沈詩鈞入讀浸會大學,同是浸大出身的辛尼哥哥,對這位學弟又有何看法?他說:「我覺得佢唔快樂。雖然佢特殊、高智慧,但佢仍然有佢兒童生活需要。我有位朋友個女兒又係差不多年紀,一樣可以去到入大學程度,但佢唔畀個女入大學,因為佢唔想個女錯過童年嗰種快樂童真生活,小朋友應該畀佢循序漸進、均衡發展。」

輕利慾拒為金錢損害名譽

《跳飛機》多年來推出過的兒歌集,先後獲得兩白金和兩金唱片成績,能夠在唱片界爭一席位,辛尼哥哥認為是一個奇迹,也是他的一個驕傲。
本來,70年代辛尼哥哥有機會成為百萬富翁,但他卻眼巴巴讓機會溜走。他說:「以前好多人搵我合作,以『辛尼哥哥』名字推出產品,好似李香琴搵我開玩具店,狄波拉叫我開幼稚園,姜大偉同李琳琳搵我做文具,肥姐叫我出童裝,又有地產公司搵我喺今日家樂商場位置開兒童樂園,好多生意idea,甚至有大財團想用我個名註冊,推出一系列紙尿片、童裝同食品,但我好藝術家脾氣,唔想咁商業化,唔想辛苦建立嘅形象因為產品出問題時而毀於一旦。」
《跳飛機》的成功,也令辛尼哥哥錯失很多演出機會。他說:「主持《跳飛機》之後被定型,我都諗過點解唔搵我做其他工作,但有好有唔好,拍劇,我唔會套套做男主角,反而做主持,次次focus喺我身上。同班小朋友一齊,就好似返番自己童年時代,感覺好開心。」

富亦貧培育新生無悔無憾

辛尼哥哥81年約滿後跟《跳飛機》告別,但他未有放棄親子教育工作,在美國、在內地、在台灣,到今天,他仍在努力,默默耕耘。
因為太熱愛工作,辛尼哥哥五年前才與拍拖多年的女友April結婚,雖然喜歡小朋友,卻從未有生小朋友打算。「喜歡同自己生係兩回事,我同太太好喜歡小動物,屋企養咗好多狗仔,又收養被遺棄嘅狗仔,愛錫佢哋好似自己仔女一樣。我生長喺基督教家庭,喺聖經中我得到一個好明確啓示:『教養孩童,使他走當行的路,就是到老他也不偏離。』就係呢一節經文成為我工作使命,今日我所擁有嘅一切都是上帝所賜。」
說抱負,辛尼哥哥希望開一間兒童藝術天才訓練學校、想重新灌錄當年經典兒歌推出CD;最近辛尼哥哥更製作了sunnygogo.com網頁,把他前半生所作所為跟大家分享。他說:「雖然金錢同物質上我好貧窮,但心靈上好富足,有日我離開世界回頭再望,我會含笑離開,因為呢個世界上,留低咗好多美好回憶。」

兒時記憶 何處再尋跳飛機

早年跳飛機這玩意公園隨處可見,今日卻已所剩無幾。辛尼哥哥當天拍照的跳飛機,位於鯉魚門海傍道中的海濱學校對出空地(圖),是校方所畫、供小朋友耍樂的。當日學校一班老師一見辛尼哥哥即興奮得拿出相機合照,又以蒸餾水和曲奇餅款待。然而興奮背後,卻教人傷感,據老師們透露,這間逾50年歷史的海濱學校因為收生不足,明年恐怕難逃殺校命運,跳飛機能否保留,一點也不樂觀。

保持聯絡 小演員事業有成

昔日《跳飛機》的一班飛機仔飛機女,今日個個已是年過30的成功人士,20多年來,辛尼哥哥仍有跟他們保持聯絡。「Nancy喺美國紐約做地產業務經理、Billy喺洛杉磯一間銀行做貸款部副總裁、文仔喺美國華盛頓做會計師、劉麗詩喺香港一間免稅店做經理、青蛙做咗連鎖快餐店經理、豪仔係電影數碼合成高級工程師、何詩敏做咗時裝設計師,同時亦係一位好出色嘅藝術畫家,至於鄭大衛同佢家姐鄭麗麗就移民咗去美國,除咗佢哋兩姊弟,其他都有保持聯絡。」

想表揚怪獸

當年扮怪獸的嚴秋華,現時在一速遞公司做經理,辛尼哥哥表示早前兒歌頒獎禮上跟嚴秋華一起擔任頒獎嘉賓時,幾乎想頒個獎來表揚他:「其實佢好慘,五年嚟都要笠住個頭、着住嗰套衫扮怪獸,拍外景焗到佢暈,但佢能夠靠聲音同肢體動作表達怪獸可愛形象,令到咁多小朋友鍾意,我覺得好難得。」

人物誌 老大哥02年娶妻

年逾60的辛尼哥哥黃汝燊(Sunny),自小醉心音樂、話劇和魔術,現為美國魔術協會會員(大衛高柏飛也是會員之一)。在浸會大學讀書期間曾為麗的(亞視前身)主持《荔園小天地》等節目;76年加盟無綫主持兒童節目《跳飛機》走紅,推出過11張兒歌專輯,收錄歌曲包括《跳飛機》、《刷牙歌》和《數字歌》等,另外又主演過電影《童軍樂》。
81年離開無綫後移民美國,85年回流香港,效力亞視。於海洋公園任職節目製作部經理,92年離開後從事節目策劃和製作,又經常參與藝人之家音樂會演出,至02年與拍拖9年女友April結婚。

娛樂資料庫:經典主持數一數

「一飛冲天去,一飛冲天去,小小穿梭機。」不少兒童節目主持事業如穿梭機般衝上雲霄,當中經典主持一定不能忘記。

譚玉瑛《430穿梭機》
譚玉瑛可謂兒童節目主持的代表,她由82年啓播的《430穿梭機》至今日的《放學ICU》,主持兒童節目逾25年。譚玉瑛姐姐在《閃電傳真機》中的烏卒卒扮相,更有點魔盜王影子呢!

梁朝偉《430穿梭機》
Cool爆的偉仔出道時加入《430穿梭機》,面對小豆丁對他似是苦差。不過其陽光男孩形象深受歡迎,而當日呆坐電視欣賞偉仔扮太空人的小孩,今日大抵要趕入戲院看《色,戒》了。

周星馳、龍炳基《430穿梭機》
當年還是星仔的周星馳,在《430》中已是嬉皮笑臉,他與龍炳基合演「黑白殭屍」環節,扮黑殭屍的星仔機智狡猾,白殭屍基仔則戇直忠厚,二人經常鬥氣,又不時發表謬論,令人捧腹。

鄭伊健《430穿梭機》
伊健跟偉仔、星爺一樣,於兒童節目《430》出身,也在這裏跟黎芷珊結下一段情緣。節目中,一班小孩習慣稱呼伊健作「伊麵哥哥」,他至今仍保留伊麵這暱稱。

朱茵《閃電傳真機》
朱茵當年主持《閃電傳真機》時,絕對可以用美若天仙、清麗脫俗來形容,當年不知有多少𡃁仔留在電視前,純粹為看朱茵。

資料來源:《蘋果》資料

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載