› 選擇地區
三藩市
紐約
洛杉磯
其他美國地區
香港 台灣 北美
 
2007年09月25日

稱危天行愛恨分明唔算奸
歲月風雲五人誌 伍衞國潑馬德鐘最過癮

伍衞國從不認為危天行是奸角,更指在《歲月風雲》中,其實每個人都有自私自利的一面。

伍衞國在無綫劇集《歲月風雲》中,飾演四大奸人之一危天行,日前劇情講述他因患上末期腦癌病逝,又被親姪危永標(馬德鐘飾)吞佔億萬家財,不得善終,但伍衞國卻大呼過足戲癮之餘,更笑言是為馬德鐘而死,他說:「我唔死,馬德鐘咪唔夠戲發揮?」

危天行在《歲月風雲》中行事心狠手辣,為求達到目的不擇手段,冷血無情,因為曾被華文翰(劉松仁飾演)出賣,懷恨在心的他千方百計向對方展開報復,但大仇未報,竟發現自己患上末期腦癌,而且更被親姪兒危永標侵佔億萬家財,含恨而終。

難忘掌摑佘詩曼

不過扮演危天行的伍衞國,卻不認為這個角色大奸大惡,他說:「忠定奸呢樣嘢其實好難講,劉松仁個角色都試過為咗一己私利出賣自己兄弟,咁佢又算唔算奸?成套劇每個人都有自私自利一面,危天行因為係二奶仔,細細個俾人睇小,所以長大之後發奮圖強,唔想衰畀人睇,佢白手興家,點知後來俾華文翰出賣,所以佢一心想向佢報復啫。在我嚟講幾欣賞危天行呢個人,佢愛恨分明,對愛情又好執着,咁多年都係咁鍾意汪紹芬(鄧萃雯飾),雖然今次戲份唔算好多,但對成個故事有個影響力喺度,都幾過癮。」
會否覺得危天行死得唔抵?伍衞國笑道:「我唔死,馬德鐘咪唔夠戲發揮?其實我死之前,仲幫Rocky(飾演危天行助手的鄭健樂)爭取加多場戲畀佢,危天行死之前對個個都有交代,好似送咗間祖屋畀大哥許紹雄,立咗遺囑照顧雯女一世,Rocky對我咁忠心耿耿,冇理由個個都有交代,淨係佢冇㗎嘛!所以我同監製講,不如加場戲交代我留咗筆錢畀Rocky啦,咁樣好似完整啲。」
問伍衞國對那一場戲印象最深刻時,他說:「有好多場都好鍾意,好似阿佘(佘詩曼)幫番華家之後,我打咗佢一巴;向馬德鐘潑酒,潑完之後仲抵死到叫佢再斟杯酒畀我,然後同佢講:『你放心,今次唔係潑你。』仲有宣萱同馬德鐘結婚我去踩場,跟住祝劉松仁引狼入室呢幾場戲,我都覺得好好玩。另外,同雯女有幾場感情戲我都好鍾意。」

慶幸毋須賣廣告

雖然《歲月風雲》收視平穩,但劇中經常出現贊助商商品,令劇集變成廣告雜誌一樣,對此伍衞國慶幸未有發生在他身上,他說:「好在我唔使,我嚟拍戲啫,點解要賣廣告呀?」
伍衞國沒在香港拍劇多年,今次何以肯接拍《歲》劇?他說:「今次係香港同內地中央台第一次合作,係一個紀錄,對我嚟講亦係一個紀錄,加上係回歸10周年嘅劇,自己都成10年冇拍,咁我都回歸拍啦!」相隔10年再在港拍劇,感覺有何不同?他笑說:「以前拍劇一定一早有晒劇本,我未拍過飛紙仔,今次終於體會到。每個時代有唔同做法,我覺得飛紙仔冇乜問題,我今次拍完之後已經習慣咗,我同監製講,以後你哋都要飛紙仔畀我,如果唔係我唔識拍。」
採訪:戴彩煥
攝影:陳慧安
場地:KingLudwigBeerhall

搶先睇:介強駕改裝車重傷

今晚《歲月風雲》劇情講述危永標(馬德鐘飾)奸計得逞,令華文翰心灰意冷,更進入康復憂鬱期,幸得華文鴻(廖京生飾)和華文碩(苗僑偉飾)鼓勵後,終重拾自信。
冼介強(吳卓羲飾)在華家的大力支持下,決定參加華喆舉行的賽車比賽,永標為了在比賽中獲勝,有助推動華喆上市計劃,竟然收買手下改裝華喆參賽車,同時在介強的飲料中落藥,令介強無法出賽。介強為了向華清琳(梁靖琪飾)表白,用意志戰勝病魔,康復後他急切到車場試車,駕駛改裝車時發生意外,隨即被送到醫院救治。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載