› 選擇地區
三藩市
紐約
洛杉磯
其他美國地區
香港 台灣 北美
 
2007年10月07日

《律政英雄》跨境緝兇
優先搜畫:木村、李秉憲鬥型鬥醒

去到韓國搜尋證物嘅木村同松隆子,居然俾成班特警圍捕,認真驚險。

將收得嘅日劇拍成電影版,可以話係當地電影界嘅公認方程式,起碼能夠吸引劇集fans買飛入場。萬人迷木村拓哉第三度跟松隆子合作嘅日劇《律政英雄》,喺01年播出時大受歡迎,成為當年日本富士電視台最高收視嘅劇集。事隔六年,兩人再次喺《律》電影版聚頭,為國民伸張正義。 撰文:戶川淳

本月18日喺香港上映嘅《律政英雄》電影版係延續01年嘅劇集,木村扮演嘅檢察官久利生公平,被調離「東京地方檢察廳城西支部」後,南至冲繩,北至北海道等鄉下地方都去過。雖然木村經常着住橙色羽絨褸,一副放浪不羈形象,不過佢對案件一絲不苟、全力追查真相嘅精神,就感染咗身邊好多同事。

赴韓搜尋證物

無綫喺今個周六(13號)播出嘅特別篇,已經為電影版埋下伏線。相隔多年木村再被調回東京地方檢察廳,同成日想上位嘅檢察官阿部寬、經常刁難人嘅女檢察官大塚寧寧等人重聚,當然唔少得跟木村關係曖昧嘅事務官松隆子。木村跟一眾拍檔再度共事,馬上就遇到前所未有嘅奇案。
曾演出日劇《不能結婚的男人》嘅女星國仲凉子,佢嘅未婚夫一日被車撞倒而死亡,兇手亦自動投案。但喺去到法庭嘅時候,兇手竟然否認控罪,仲喺松隆子父親松本幸四郎飾演嘅日本首席大律師辯護下,獲判無罪釋放。
表面睇嚟係宗單純嘅誤殺案,卻被木村揭發出幕後黑手重重,最後更牽涉到國會議員身上。至於兇案證物就流落咗去韓國,木村於是帶埋松隆子遠赴釜山調查,同李秉憲飾演嘅精明檢察官合力追查真相。至於兩位主角合力追查之際,又令放低咗六年嘅感情再次擦出火花。

票房勢破紀錄

木村同松隆子因合作日劇《悠長假期》同《戀愛世紀》,成為咗日劇金童玉女同埋收視保證。再加上有份演出嘅阿部寬、綾瀨遙等演員都有固定fans,所以電影上映四個幾星期,票房就已經突破60億日圓(約四億港元),富士電視台仲好有信心電影能夠突破6.7億港元票房,成為今年最賣座日本電影。

客串小八卦:欽點憲哥假公濟私

木村拓哉等人喺今年4月,大陣仗走到去韓國釜山拍攝《律》片外景,可惜就辣起唔少火頭。當時木村同有份客串嘅李秉憲喺當地開咗個記者會,可惜所屬嘅尊尼事務所諸多限制,嚴禁記者發問有關歷史或政治問題,又唔可以公開電影拍攝行程,令傳媒十分不滿,批評木村大牌。另外,早前又有報道指木村嘅女經理人係憲哥忠實fans,佢為求見偶像一面,要求電影公司勞師動眾去韓國拍攝,仲夾硬加咗個角色畀憲哥演,但係原來只有5分鐘戲份,都算離譜!

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載