› 選擇地區
三藩市
紐約
洛杉磯
其他美國地區
香港 台灣 北美
 
2007年10月23日

為門票父子反目Fans鬧
華仔上天遁地盼唱多10場

劉德華以太空人造型坐在太空艙內登場,甚有氣勢。

一連12場「劉德華WonderfulWorld演唱會2007」於12月舉行,昨日舉行記者會,華仔演唱會反應熱烈,未公開發售內部訂購早已爆滿,華仔呼籲大家不要再在公開場合鬧他,如果他能力做到,不惜連阿爸的門票也分給大家,他希望能加開10場便可皆大歡喜。

劉德華將於12月21日至1月1日於紅館舉行一連12場演唱會,昨日在尖沙嘴舉行記者會,記者會佈置有如外太空,華仔以一身太空人造型從太空船艙亮相,其後由舞蹈員撕開太空人衫,原來華仔內裏已穿上整齊西裝,官仔骨骨的與司儀傾偈,席間滙報華仔在過去內地巡迴時所創下的紀錄,最驚人莫過於他飲了近10萬元的開聲茶。華仔笑說:「係呀,一次開聲茶要成$6,000㗎,唔只補聲仲補身嘅。」

若加場一次過

演唱會在明天才公開發售門票,不過內部訂購一早爆滿,連司儀也問華仔取飛?華仔笑謂:「我同阿爸反咗面,𠵱家唔係一齊住㖭,真係有好多人問我有冇飛,大家唔好再公開鬧我,有歌迷都問參加歌迷會做乜嘢,如果我有能力我會攞番阿爸啲飛畀佢哋。」
華仔坦言:「如果有多10日期,畀我加多10場可能就夠飛派,不過如果要加會一次過加,唔會分開,因為怕啲歌迷排隊好辛苦。」華仔強調今次香港演唱會與之前內地巡迴,無論內容服裝都完全不同,會比較夢幻。

九卡鑽石任用

華仔今次的演唱會獲鑽飾贊助,問他會否戴上鑽飾表演,他表示贊助商有粒九卡鑽石讓他任意擺佈,華仔說:「都唔知做乜嘢好,做耳環我又冇耳窿,如果做攝石款,跌咗咪要賠。」記者取笑華仔有如此多歌酬,何須怕賠錢,他笑說:「咁都唔係咁嘥錢㗎。」
採訪:胡比
攝影:林德雄

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載