› 選擇地區
三藩市
紐約
洛杉磯
其他美國地區
香港 台灣 北美
 
2007年10月23日

神交多年火花四濺
奸人誌:林嘉華撞奸人股噴鼻血

林嘉華笑言多年來十分欣賞黃子華,今次答應接演《奸人堅》扮戇直黃飛鴻,也全因希望與對方合作。

在近日熱播無綫劇集《奸人堅》中,林嘉華接棒做電視版第8代黃飛鴻,再演電視劇的原因,林嘉華坦言是為了黃子華,因「覺得同子華可以有啲嘢出到嚟。」結果新一代黃飛鴻跟奸人堅擦出火花之餘更出埋血,拍攝一場舞獅戲期間,林嘉華慘遭子華屁股撞穿鼻膜,上演了一幕如假包換的黃飛鴻血戰奸人堅。 第二回

關德興演繹的黃飛鴻,是經典中的經典,而過去曾在電影及電視劇中扮演此角色的,還有李連杰、趙文卓和譚詠麟等,輪到《奸人堅》的林嘉華,屈指一算已是電視版第8代。不過林嘉華扮演的黃飛鴻,既不像關德興般忠直,也不如譚詠麟般搞笑,而是一個戇直的新版本。

「一直好欣賞子華」

嘉華說:「將關德興嘅黃飛鴻轉為喜劇人物係好好笑,譚詠麟當日做嘅比較搞笑,我嘅黃飛鴻係有少少戇直,佢一心導奸人堅向善,但俾對方搵咗笨都唔知嗰種。」
早前嘉華為替《奸人堅》宣傳造勢,不惜公然親吻子華面頰,上演一幕古代版斷背山,原來林嘉華今次接演《奸》劇,也全因為一個黃子華,他說:「我拍呢部劇嘅原因,一來覺得好過癮,二來呢個組合自己都好想試,覺得同子華可以有啲嘢出到嚟,我一直好欣賞佢,覺得佢好有才華。
「其實我同佢都有啲淵源,我係佢學長,大家都係讀聖若瑟。記得我同佢第一次接觸係喺電話度,沙士嗰年佢去多倫多做騷,我喺加拿大做電台節目,同佢做咗個電話訪問。舊年我返香港拍《學警出更》,子華又去多倫多做騷,我都專登叫我太太送個花籃畀佢。直至拍《奸人堅》之前,葉童約埋監製、子華同我一齊食飯傾吓部戲,我先至第一次同子華見面,佢仲記得我送過個花籃畀佢,一見到我即刻話多謝㖭。」
不過今次跟子華合作,嘉華不但擦出火花,原來還出埋血,他說:「有場舞獅戲,子華舞獅頭,我舞獅尾,劇本本來只係要我頂住佢,我話不如我成塊面隊埋佢屁股度啦,效果好似好啲,子華聽到之後即刻話:『呢啲就叫做演員道德啦!』嗰次我直情隊到出埋血,因為佢一撞埋嚟就撞到我流鼻血,子華猛話唔好意思,我話唔關事,我諗如果換轉子華係我,佢都會咁做。」
螢幕上黃飛鴻身手了得,fit到漏油,但螢幕下嘉華卻打到氣喘,他說:「雖然以前我拍過唔少動作戲,但話晒黃飛鴻都係一代宗師,我又冇武術底子,打起上嚟都好辛苦,有時耍拳,手位差兩寸都要NG,當然有唔少武打場面都會有替身,如果我話冇都係呃人。」

三角戀兩敗俱傷

黃師傅教訓奸人堅,拳拳到肉,拍攝初期嘉華會就住來打,以免真的打傷子華,但子華為求效果逼真,自告奮勇在身上加護墊後實行讓嘉華毆個痛快,結果最後連嘉華也有樣學樣。他說:「子華叫我出力打佢,後來有幾場戲係奸人堅幻想自己點樣擊敗黃師傅,為咗效果好啲,我都墊嘢等佢搏命打。同子華合作都有啲嘢撞到出嚟,大家拍嘅時候都會有意見,我覺得成個氣氛好好。」
黃飛鴻系列故事,最後黃師傅例必打贏奸人堅,令對方痛改前非,《奸人堅》也不例外,至於二人與凌玉翠(葉童飾)之間的三角戀,黃飛鴻跟奸人堅最後原來兩敗俱傷。嘉華說:「黃飛鴻最初唔知乜嘢叫愛情,佢只係為咗繼後香燈而結婚,同葉童相睇,葉童同奸人堅係寃家,佢哋係有愛過,但最後葉童係冇同到奸人堅或者黃飛鴻一齊。」

自創抵死宣傳片

其實《奸人堅》未推出時,宣傳片已先聲奪人,尤其嘉華扮70年代主持《警訊》的宣傳片更是抵死。原來這一條宣傳片,林嘉華也有貢獻,他說:「我加咗少少嘢落去,我叫大家如果有奸人堅消息,可以飛鴿傳書畀我,跟住好多白鴿飛埋嚟,原本安排係冇白鴿掟落我度,我見現場有咁多臨時演員,又有咁多白鴿,就建議導演不如搵班臨記一齊掟啲白鴿落我度,咁做法其實有兩個意思,第一係證明奸人堅真係好乞人憎,咁快已經有feedback,第二係細蚊仔睇落會覺得好得意。」
採訪:戴彩煥 攝影:葉君海

傳奇小八卦:廣東十虎濟世為懷

家喻戶曉的黃飛鴻(1847─1924圖),生於廣東佛山,與其父黃麒英同為廣東十虎之一。黃飛鴻自小習武,曾設館授徒,並在廣州仁安里設寶芝林醫館,行醫濟世。黃飛鴻的徒弟林世榮後來移居香港,武術指導劉家良的父親劉湛便是其弟子。
黃飛鴻鋤強扶弱的精神受世人景仰,以他為主題拍攝的電影和劇集逾百部,關德興是扮演黃飛鴻的鼻祖,49年的首部黃飛鴻電影《黃飛鴻傳上集之鞭風滅燭》便是由他主演,他所參演的黃飛鴻電影逾70部,而扮過黃飛鴻的演員還包括劉家輝、成龍、李連杰及趙文卓等。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載