蘋果日報 | APPLE DAILY
› 選擇地區
三藩市
紐約
洛杉磯
其他美國地區
2007年12月05日

馮仁昭四圍超:
岳少歲晚執東亞衛視 林祖輝失業 - 馮仁昭

林祖輝喺東亞衛視做製作總監,公司執笠,佢話冇拖欠人工,因為老闆大把錢,咁佢老婆姚嘉妮唔使擔心啦。 資料圖片

麗新集團老闆林建岳近年嚟醉心發展娛樂事業,旗下東亞娛樂同寰亞電影都搞得有聲有色,唔少紅星鄭秀文、楊千嬅同劉德華都同佢公司合作,可以話林建岳近年嚟已經成為新一代嘅娛樂班霸,之不過佢喺01年搞嘅東亞衛視就因為年年蝕本,終於要執笠啦!

日前接遣散通知

位於鴨脷洲海怡半島嘅東亞衛視製作中心,設有兩個專業數碼演播室,呢個台約有20名全職員工,日前佢哋收到公司嘅遣散通知,做埋呢個月底公司會終止營運。身為東亞衛視製作總監嘅林祖輝噚日話:「𠵱家幫緊啲同事做善後工作,睇吓可唔可以幫佢哋介紹到新工,始終𠵱家年尾。」問林祖輝擔唔擔心公司會拖欠薪金?祖輝就話:「老闆大把錢,應該唔會。」
突然失業,祖輝喺經濟上會唔會有問題?佢話:「咁又唔會,我近排讀緊碩士學位課程,最近忙趕功課,𠵱家呢個時間停咗(工作),對我財政上冇影響。」
此外,東亞衛視節目《光影三人行》嘅主持林奕華噚日就回應話:「今個星期會錄最後3集,啱啱好完結呢個season。」佢唔係好清楚公司結業嘅事。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載