蘋果日報 | APPLE DAILY
› 選擇地區
三藩市
紐約
洛杉磯
其他美國地區
2008年02月03日

14歲箍牙薯妹撞入行
紅模坊:Angelababy蛻變姬魔

Angelababy希望「賺多啲錢,畀屋企人買多啲嘢,開心啲」,信念簡單直接。

上海出生、18歲的新晉人氣女模楊穎(Angelababy),去年人氣hit爆,於周杰倫演唱會演出,在後台看他的私家魔術,萬千寵愛,更被封為「𡃁界索模」、「女神二號」,她對所有稱號欣然接受,但揚言要做得更好,變身名模KateMoss。 撰文:羅慧敏

月底滿19歲的Angelababy,07年才全職入行,已火速與好姊妹JaniceMan(文詠珊)被封為新一代少男殺手。JaniceMan被封「𡃁界女神」,樣子型格甜美的Angelababy,同樣人氣急升,一時被封為「𡃁界索模」,一時被封「女神二號」,參演電影《破事兒》、在周杰倫的演唱會上大跳辣身舞,又成為日本女性雜誌《Dear》封面女郎,更成功泊到熊黛林公司的碼頭做其師妹。

開朗主動佔優

Angelababy前日在公司位於天后的辦公室接受記者專訪時,擺甫士出奇專業,又爽直可愛,的確相當惹人好感。Angelababy指一切發展只是順其自然,她說:「我中三先返香港讀書,14歲嗰陣,有個同學仔將我嘅相寄去《YES!》雜誌,因為我𠵱家經理人Kim嗰時就喺《YES!》做,所以識咗佢、又簽咗約,到𠵱家囉。讀書時有做Disneyviviclub節目主持,同埋拍啲港台劇,不過我嗰時廣東話仲唔正,唔鹹唔淡,成日俾人笑㗎。」
Angelababy去年發力,形象又做得好,連一眾名牌如MiuMiu、Loewe、MarcbyMarcJacbos也樂意借衫讓她出席活動。她說:「最開心係做周杰倫演唱會,因為佢係我超級偶像,佢所有碟我都有收藏,嗰次我真係拎晒所有碟畀佢簽名,佢仲喺後台表演魔術畀我睇。」機會比人多,問她自評有甚麼比同輩優勝?Angelababy想一想說:「我個人好開朗,都鍾意同人相處,會主動識朋友。」外界將她封為「𡃁模」,她毫不在意說:「呢個係外界嘅稱呼,我唔反感,希望再做好啲,除去呢個名,變成名模啦。」不過Angelababy的模特兒界目標,卻不是師姐熊黛林,她說:「我想好似KateMoss(超模姬蒂摩絲)咁,因為KateMoss身材唔高,好似我咁上下,但佢就好出名,所以我想似佢,我好鍾意佢。」

網誌寫我心情

雜誌對照她14歲入行時的四眼薯妹相片,即惹來整容之說,Angelababy說:「識我嘅人就知我冇整過,雜誌登嗰啲係我箍牙同面最腫時嘅相,𠵱家只係冇晒babyfat,我唔介意人哋點講,不過多咗人寫,點都係開心嘅。」不止多人寫,她的blog也是點擊率高企的熱門blog,她說:「我由細到大都鍾意寫blog,由05年開始寫,原意係畀啲唔喺我身邊嘅人都知我做緊乜。」
Angelababy網誌: http://www.xanga.com/angelababy
攝影:陳俊強
服裝:MarcbyMarcJacobs

人物誌:國產港女中三回流

姓名:楊穎(Angelababy)
出生日期:89年2月28日
身高:1.68米
三圍:32、23、34
體重:100磅
學歷:聖心商科畢業

簡介:媽媽是上海人,爸爸是香港人,而父親的外婆是德國人,有小量德國血統的她,在上海出生後就跟隨媽媽在當地生活,中三才回港升學,在聖母院書院讀到中五。14歲開始做兼職模特兒,曾拍港台劇《天下無敵》、《獅子山下》,去年開始全職投身幕前,參演電影《破事兒》,又是時裝品牌2%代言人、HarbourCity廣告女郎。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載