› 選擇地區
三藩市
紐約
洛杉磯
其他美國地區
香港 台灣 北美
 
2008年02月11日

餅女鼠年各精采 Miki闖影壇
Theresa做過第三者最怕桃花劫

Theresa笑言怕行錯桃花運變成桃花劫,故寧願專注工作不拍拖。

鼠女傅穎(Theresa)今年犯太歲,不過她膽識過人自言不怕惹是非,反而怕一些人身攻擊的報道會令自己不開心,又笑言怕行錯桃花運變成桃花劫,現時只以工作為重。至於楊愛瑾(Miki)比起其他3位Cookies成員,去年算是最不活躍的一個,不過今個鼠年她已訂下新年大計,除希望成功考到車牌外,還想在影圈闖出一番事業。

相關新聞:基仔:10年冇拆利是

鼠女傅穎日前到將軍澳與一大班「同類」米奇老鼠合拍新年照,對於本命年犯太歲易惹是非,膽識過人的她說:「今年我係犯正太歲,聽講會情緒唔穩定同埋個人好易鑽牛角尖,不過我本身唔驚是非,是非總好過人身攻擊嘅報道,呢個圈唔係是非就係緋聞,我反而怕因為啲報道而情緒唔好,搞到唔開心啫。」

買錯梅花當桃花

記者提議她可加強桃花來增加人緣,Theresa即耍手擰頭表示怕行錯桃花運,最終變成桃花劫,她笑說:「因為我有個朋友上年買錯梅花當桃花,衰足一年,而且我每年都唔會理桃花,因為怕有桃花劫,我入行前好多桃花劫,成日都被男仔隱瞞做咗第三者,所以入行後好識保護自己,唔會隨便拍拖。」
農曆年期間Theresa會聯同古巨基、梁漢文及側田等人,到拉斯維加斯及加拿大登台,首次出埠過年的她十分興奮,笑言連情人節當日也會與幾位猛男共度,她說:「我仲同梁漢文講笑話情人節同我過佢就發達啦,不過我都好鍾意喺工作中度過,因為我一放假就好易病。」
另一方面,楊愛瑾新年期間沒有工作,可以留在家裏陪伴家人及朋友,她笑言已準備5位數字來派利是,問她會否怕遭親友催婚,她笑說:「梗係冇,我仲咁細個,其實入行之後第二年我已經開始派利是,不過都要視乎嗰年搵得多唔多,今年都會OK㗎。」
為了應節,Miki日前到中環試穿旗袍,她表示隨着年紀漸長,也越懂欣賞女性穿着旗袍時的美,她說:「因為旗袍個cutting好靚,最能夠帶出女性嘅韻味。」

今年專注拍電影

去年工作不多的Miki,表示新一年已訂下人生目標,首要是盡快考到車牌,工作則主力在拍戲方面發展,對於Cookies昔日戰友鄧麗欣和吳雨霏相繼舉行個唱,Miki表示現階段只想專注拍戲,她說:「我都戥佢哋開演唱會開心,不過我𠵱家好鍾意演戲,但我唔係放棄唱歌,都有keep住練歌,我只係想喺電影圈站穩腳先,最想有齣代表作,最終目標梗係攞獎,𠵱家自己都努力緊。」
採訪:駱華齡
攝影:林德雄、陳慧安
髮型:VincePang@ILColpo
場地提供:Trendyland(Theresa)、上海灘(Miki)
服裝提供:上海灘(Miki)

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載