› 選擇地區
三藩市
紐約
洛杉磯
其他美國地區
香港 台灣 北美
 
2008年03月30日

無綫御用的士佬起底
鬧完嘟嘟有Fans

跟《頭文字D》周杰倫相比,土炮頭文字「的」阮毅雄,擺起甫士時也信心十足絕不輸蝕。攝影:林德雄

比起《頭文字D》日日揸車到秋名山送豆腐的藤原拓海,55歲土炮頭文字「的」阮毅雄耐力同樣驚人;打從80年代四台山開始,揸的士的阮毅雄已在電視劇中客串演的士司機,由年輕做到中年,默默見證電視劇興衰,被網民封為無綫御用的士司機;而當年《男親女愛》中鬧鄭裕玲八婆一幕,便是他從演以來最感過癮的一次。 撰文:戴彩煥

近日有超級電視迷把一名經常在無綫劇集中飾演的士司機的臨時演員電視畫面發放到互聯網,這名演員由88年《無名火》到08年《和味濃情》,一直扮演的士司機角色,由烏黑濃髮做到兩鬢斑白,20年來默默見證無綫劇集興衰,敬業樂業精神令網民尤為讚賞。這位引起網民熱烈討論的無綫御用的士大佬,真正身份也是的士司機,拍劇純為玩票性質而已。

同黃日華捱飯盒

55歲的阮毅雄(行內人暱稱阿阮),做過廚房、車房後,於20多年前轉職的士司機,回想起他與無綫的「第一次」,阿阮仍記憶猶新:「1987年左右,當日我揸的士搵客,無綫有個劇務截的士,話想借我部車拍劇,話畀番60、70蚊車租我,我覺得冇乜所謂,反正我都係搵客,就係咁開始;但初初無綫只係租我部車用,跟住搵劇務揸,拍咗幾次之後,佢哋覺得我睇位都幾準,開始對我有信心,於是叫我試吓自己做埋。」阿阮第一部「演出」劇集,是88年石修主演的《無名火》,但他表示首次正式有對白,要算是89年黃日華主演的《義不容情》,他說:「我記得黃日華喺部劇係揸的士,我做佢行家,見佢食飯盒,問佢點解咁搏命,跟住佢話要供個細佬讀大學咁。第一次講對白好驚㗎,但導演話我OK合格,咪做落去!」

不發無謂明星夢

90年至00年間,阿阮曾轉到車房工作,所以那段時間未見他在電視露面,但做了幾年後,還是覺得老本行較適合。過去20年來,阿阮客串了20多部電視劇,最難忘要算是《男親女愛》,阿阮說:「嗰集講我落車鬧鄭裕玲八婆,個導演叫我放膽鬧佢啦,唔使怕。」
原來,除了演的士司機之外,阿阮也曾演過路人甲;當年夏金城把的士賣掉自資出唱片做歌星,未知他又可曾想過全身投入幕前演出做明星?阿阮謙虛笑道:「我冇受過訓練,我有自知之明,所以諗都唔會諗。我嗰啲邊度算係做戲,我只係問啲人去邊度,跟住睇錶收錢,我當做生意接order之嘛,我又唔係為名,反正都係揸的士開工,間中有得睇吓明星,幾好玩、幾得意吖!」

佩服網友心水清

經常在電視劇出現,可曾被乘客認出?阿阮說:「都有㗎,有啲師奶、學生話睇電視見過我,問我搭的士有冇折頭,但我話:『收足。』」近日有網民把阿阮歷年演出照片放上網,封他為無綫御用的士司機,阿阮坦言佩服:「我都嚇一跳,我喺電視出現曇花一現,30秒都唔夠,估唔到啲人會咁心水清,我諗嗰個人真係超級電視迷。」

話你知:做臨記好搵過揸車

從事的士行業20多年,阮毅雄一直是租車開工,他開的是特別更,每朝7、8時至晚上7、8時,時間自由,為無綫開工也較方便。收入方面,扣除車租和油錢等開支後,每日平均收入約300元至500元不等,雖然問阿阮為無綫劇集演出工資多少時,他以商業秘密為由拒絕透露,但據悉無綫租用的士拍劇價錢以每四小時為一更計算,每更約520元,若超時的話會再補水。
近年市面上出現不少折扣的士,未知阿阮又有何意見?阿阮說:「好難講,如果啲人住得遠,搭的士係好重皮,如果一程慳幾十,慳幾次就可以坐多一程。折扣的士對我哋影響一定有,但人哋咁做都冇辦法。」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載