蘋果日報 | APPLE DAILY
› 選擇地區
三藩市
紐約
洛杉磯
其他美國地區
2008年05月18日

亞視鎮台寶 從九斤哥到議員
56歲劉志榮突然病逝

1952—2008
劉志榮曾是麗的和亞視年代的當家小生,形象成熟穩重。

憑電視劇《大地恩情》的九斤一角深入人心、後離開亞視從政的劉志榮,大前日(15日)在伊利沙伯醫院因心臟病引致的併發症逝世,終年56歲。劉志榮曾被喻為亞視之寶,見證麗的到亞視多個年代的興衰轉變,昔日曾跟他合作過的眾多同僚,得知噩耗後都深感突然和痛惜,並大讚劉志榮是個樂於助人的君子。

劉志榮於70年代加盟麗的電視(亞視前身),曾主演過《變色龍》、《大地恩情》及《浮生六劫》等經典電視劇,當中以《大》劇中的「九斤」一角最廣為觀眾熟悉,99年劉志榮離開亞視從政,競選時市民也親切地稱呼他做「九斤哥」,可見其角色何等深入人心。

民建聯發聲明悼念

現為油尖旺區議員及民建聯第九屆中央委員的劉志榮,大前日(15日)在伊利沙伯醫院病逝,終年56歲。據了解,劉志榮是因為心臟病併發肺炎去世。劉志榮所屬的民建聯昨日發出公告,表示對他的去世感到極之悲痛。劉志榮屬民建聯中央委員,去年底區議會選舉成功連任,民建聯在公告中形容劉志榮去世是民建聯一大損失,民建聯仝人深感悲痛,並向劉志榮家人致以深切慰問。
有民建聯中人說,他們一直關注劉志榮的病況,稍後會與他的家人接觸,提供協助。至於劉志榮的後事,要待與他的家人商討後,才會進一步公佈。
劉志榮是老牌影視明星及粵劇老倌劉克宣之子,也是無綫前藝員楊羚的舅父,記者昨日就劉志榮病逝消息致電楊羚,她聲音沙啞語調哀傷地說:「唔好意思,我唔想講。」

明顯消瘦行動緩慢

人稱劉翁的劉志榮,曾被喻為亞視鎮台之寶,對於他的去世,亞視方面昨日表示深感惋惜,亞視高級副總裁陳灌明說:「佢係一位好難得嘅藝員,不論麗的或者亞視年代,都作出好多貢獻,我哋考慮緊製作特備節目作為對佢嘅懷念,同時考慮緊重播一啲當年佢演出嘅經典劇。」
與劉志榮私交甚篤的薛家燕,昨日接獲他的死訊後大表震驚,她說:「我唔知佢病,聽到呢個消息覺得好可惜。佢好熱心幫人,記得早幾年我買咗縮水舖俾人呃,因為佢係油尖旺區議員,所以搵佢幫手,佢好落力幫忙,跟進咗件事幾年。最尾一次見佢係大半年前,大家要一齊開會,我見佢戴住帽,瘦咗好多,心諗佢係咪有病,開會途中佢話會交畀其他同事跟進,但我助手講一個月前嘅文件往來,都係劉翁簽名嘅。」
數月前曾在街上巧遇劉志榮的文雪兒則說:「個幾月前我喺佐敦地鐵站見到劉翁,大家都有傾偈問候,當時佢一個人,行動好緩慢,但好健談。」

余安安:佢好聰明

身為劉志榮徒弟的安德尊,昨日透過短訊回覆說:「驚聞噩耗非常難過,劉先生與我感情深厚,是德尊入行時候啓蒙老師,消息來得非常突然,自去年華叔肥姐辭世之後,這數月來身邊的親人同事前輩離世有十多個,打擊到透不過氣來,這一刻我謹向劉先生的家人莊姐及健樂(劉志榮之子)致以深切的慰問,亦希望劉先生回到天主的懷抱,得享永生,這幾年他累透了。」
過去曾多次與劉志榮合作拍劇的陳曼娜說:「以前喺麗的映聲時,劉翁、李道洪、劉松仁同我係當年嘅小生花旦。自從十年前佢開始從政,之後好耐冇聯絡。佢好鍾意扮佢爸爸劉克宣,表情同神髓都好似。」
曾與劉志榮合拍《大地恩情》的余安安昨日則在電話中說:「好突然,之前同佢合作,佢好聰明,好好人,當年佢最鍾意喺我面前扮佢爸爸劉克宣,佢又鍾意搞笑,嗰時拍《大》劇好多苦情戲,大家情緒唔多唔少都會有啲影響,但佢成日引我哋笑,所以同佢合作好開心。」
黎小田昨日說:「早排先提起佢,因為佢係廣西政協,之前有個朋友想喺南寧做生意,都想搵佢。」
採訪:林妃

生平:粵劇老倌劉克宣之子

剛病逝的亞視前藝員劉志榮,其父為香港著名老牌電影演員及粵劇老倌劉克宣,劉志榮的妻子則是亞視前女藝員梁淑莊,兩人育有一子。劉志榮1973年加入麗的映聲後,在電視台經歷數個年代至亞視,依舊效忠,更成為亞洲電視「鎮台之寶」,多年來主演過不少令人印象深刻的劇集,如《大地恩情》及《變色龍》等。
劉志榮也是一位出色的司儀,除主持遊戲節目「開枱」外,又曾主持多屆亞洲小姐競選,99年他開始投身政界,參加香港區議會選舉,是現任香港油尖旺區議會佐敦選區區議員及民主建港協進聯盟九龍西支部副主席。

亞視拍檔難捨劉翁

劉志榮生前人緣甚廣,對於他突然病逝的消息,不少昔日曾與他合作的演藝界人士均深感可惜。

黎燕珊:聽到個消息好愕然,仲停咗一陣唔識郁,人生真係好化,佢係第一屆亞姐嘅司儀,佢見我哋對答冇乜經驗就會好自然幫我哋兜,諗番起佢都係亦師亦友,之後利智嗰屆都係我同佢做司儀,佢仲教我好多臨場表現,為人好風趣,成日講笑。

朱慧珊:亞姐選舉我拍住劉志榮做司儀,可以講係合作無間,佢係一個好好前輩,每次都提點我,又教我執生同做司儀技巧,不過自從佢做咗區議員之後就好少聯絡啦!

魏秋樺:我過麗的嘅第一齣劇《變色龍》,就係同劉志榮合作,佢份人好好,又唔煙唔酒,又唔出去蒲,好錫老婆,咁多年嚟都冇緋聞,係個正人君子,我同佢合作過好多部劇,佢好鍾意講笑搞吓氣氛,未做司儀之前已經口才好好,為人仲好樂觀。佢年紀又唔係大,點會發生咁嘅事,太突然,我真係接受唔到呢個消息。

蕭若元:好愕然,佢仲好後生。劉志榮嘅《大地恩情》係我編劇,佢演得最好就係《變色龍》,我同佢老婆反而熟啲,以前梁淑莊做天氣女郎,成日喺公司行上行落,後尾係我哋掹番佢出嚟拍劇嘅。

柳影虹:好可惜好突然。以前喺麗的同佢合作過,佢好好人,係一個老闆好鍾意嘅夥計,每個老闆上場都覺得佢OK㗎!佢好識做人,唔會得罪人,好圓滑,對朋友又好,從來都唔發𤷪𤺧,又唔會大聲講嘢。當年佢爸爸過身,雖然佢仲要開工,但好堅強。希望佢太太莊姐節哀順變。

鮑起靜:當年同佢合作《大地恩情》,佢好活潑開朗,又鍾意唱歌,平時收工車埋我返屋企時,都邊揸車邊唱歌。

陳秀雯:我好耐之前同劉志榮合作過一套劇,其實唔係太熟,但聽到認識嘅人離開,感覺會怪怪地,人生有時候係好無常,希望佢家人節哀順便。

甄子丹:我同佢十幾年前喺亞視合作過,嗰時我哋都叫佢劉翁,佢係前輩所以都好有經驗,不過合作完之後冇聯絡,佢係一個冇乜嘢脾氣嘅人,人面都好

劉志榮部份作品

1974年
作品:《金粉世家》、《紫杜鵑》、《殞星》、《梁天來》、《失落的風鈴》

1975年
作品:《海角風雲》、《疑雲》

1976年
作品:《三國春秋》、《半生緣》

1978年
作品:《變色龍》

1979年
作品:《新變色龍》

1980年
作品:《大地恩情之家在珠江》、《大地恩情之金山夢》、《浮生六劫》

1981年
作品:《浴血太平山》

1982年
作品:《雄霸天下》

1983年
作品:《八美圖》、《世界仔》

1984年
作品:《表錯七段情》、《霍東閣》

1985年
作品:《諜網迷情》、《魅力九龍塘》

1986年
作品:《時光倒流七十年》

1987年
作品:《紅塵》、《梟雄》

1988年
作品:《賭徒》

1990年
作品:《Q表姐》

1991年
作品:《觸電情緣》

1995年
作品:《精武門》

1996年
作品:《親親,親人》、《一人有一個理想》

1997年
作品:《97變色龍》

2001年
作品:《電視風雲》

資料來源:《蘋果》資料室

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載