› 選擇地區
三藩市
紐約
洛杉磯
其他美國地區
香港 台灣 北美
 
2008年06月26日

月入萬三 忽然富貴
馮仁昭四圍超:翠翠自稱炒股一年賺三千萬豪宅 - 馮仁昭

擁有34D上圍嘅葉翠翠,最近忽然富貴,不過佢話同自己投資有道有關。資料圖片

最近05年港姐冠軍葉翠翠唔單止上圍升級到34D,身家都忽然豐厚,有消息指佢今年5月用個人名義,喺短短8日間,先後喺北角豪宅區嘅賽西湖大廈買咗兩個豪宅單位,合共3,100萬元。其實葉翠翠由無綫普通藝員約改簽六年經理人合約,每個月固定月薪13,000蚊,收入有限,一直都係同幾隻狗喺灣仔舊樓居住。家境又唔算富裕,翠翠阿爸早前退休零收入,阿媽又患嚴重腎病,屋企經濟真係掹掹緊,所以佢之前成日話要孭起成頭家。今次佢一次過打孖買兩個單位,即時將「悲情港姐」封號洗底。

指父母全職炒股

翠翠唔單止有靚樓揸手,坐慣八折的士嘅佢,近日仲有Alphard星級保母車管接管送,貴氣十足,難怪被傳有老細大水喉射住,不過葉翠翠噚日喺電話中否認話:「唔係,架車係親戚借嘅,間唔中會用,我𠵱家都仲有call平的士坐。」
提到一口氣買兩個豪宅單位,葉翠翠就解釋:「屋企人一早有呢個計劃,唔突然,我舊年夏天開始買股票投資,第一隻買嘅係中國人壽,我趁佢低買,賺咗一倍有多,之後開始學人哋短炒,啲本係我喺TVB搵番嚟嘅人工,𠵱家跌巿,我都吼緊再出擊。其實阿爸阿媽都全職炒股,所以層樓係屋企人都有份。」
咁點解業主唔寫父母個名?葉翠翠話:「寫邊個都冇所謂,呢個係佢哋嘅決定。」佢又話遲啲收咗樓同裝修好,諗住一家人搬入去住。翠翠猛話自己投資心得係夠博,似乎同佢平時着到鬼咁性感出騷博搶鏡嘅戰鬥格好鬼似,對於被指身邊有富貴朋友射住,佢例牌否認話:「我冇識男仔,冇富貴朋友喺身邊,唔好成日講拍拖啲嘢,隨緣啦。」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載