› 選擇地區
三藩市
紐約
洛杉磯
其他美國地區
香港 台灣 北美
 
2008年07月12日

轟TVB頒獎禮搞分化
吳鎮宇爆杏兒哭訴拍劇靠關係

吳鎮宇爆當年拍《衝上雲霄》時有女演員哭訴拍劇要靠關係,據悉該女演員正是飾演其女友的胡杏兒(右)。 劇照

近日在深夜播映的無綫劇《衝上雲霄》中,飾演Sam哥的吳鎮宇昨日凌晨為吳君如主持的電台節目擔任嘉賓時,批評無綫現時捧新人的方法不當,大爆當年有女演員跟他哭訴拍劇不是講演技而是講關係,據悉此人便是胡杏兒。鎮宇更坦言不喜歡無綫舉辦的台慶頒獎禮,認為無綫此舉擺明是閂埋門分化自己人。

無綫近日深夜重播吳鎮宇主演、03年首播的《衝上雲霄》,反應熱烈,創下無綫深夜高收視紀錄,平均收視7點,約44萬觀眾捧場。再次開咪的吳君如遂於昨日凌晨主持的商台節目《嘩!嘩!嘩!打到嚟!2008》,邀請在《衝》劇飾演Sam哥的鎮宇做嘉賓。二人大談當年在無綫拍劇趣事外,更狠批如今電視劇及演員水準下降。

新人缺演技訓練

君如在節目中狂踩近日徐子珊和馬國明主演的《甜言蜜語》,指一班新人演技似是業餘,鎮宇也認為無綫捧新人方向錯誤,指他們根本沒有任何演技訓練。原來當年拍《衝》劇時,鎮宇曾經訓示新人,他說:「有次我特登NG嗰個人30幾次,話畀佢聽點解唔熟讀對白入嚟,成班人特登侮辱佢。」
鎮宇透露拍攝該劇期間,他曾叫一個女演員畀心機做戲,沒料到對方竟喊起來,她更揚言現在拍劇不是講演技,而是講關係。鎮宇說:「有乜理由會搞到咁?乜嘢仔仔女女啫?又搞個乜帝乜帝(視帝),一個電視台閂埋門嚟分化自己人。今屆你攞,下屆邊個,如果佢攞咗我唔攞咪大件事?我唔鍾意呢樣嘢囉。」據悉該女演員便是胡杏兒,她於04年6月接受雜誌訪問時謂雖然自小性格較為好勝不易哭,但也有例外的時候,她表示拍攝《衝》劇時曾因NG而哭,當時因為演得不好而NG了很多次,不知所措的她結果哭了出來。

斥編劇水準下降

其實當時在《衝》劇中,與鎮宇有對手戲的女演員只得葉璇、陳慧珊及胡杏兒,其中他跟葉璇的對手戲最少,而陳慧珊當時已有多年演戲經驗,與鎮宇口中的新人身份有所不同,惟獨是新人、又跟他飾演情侶的胡杏兒最脗合。昨日記者曾就鎮宇言論致電杏兒了解,但她否認是鎮宇所指的女演員,她說:「嗰個一定唔係我,拍劇點會唔係靠演技㗎!」
另外,鎮宇每次回娘家拍劇,也希望改變現行電視制度,如拍《衝》劇時,他告訴助理編導說:「我話嚟唔到,你啲通告咁密。佢話唔緊要,我log你(行內術語,意指寫報告)囉!跟住我又拆門又掟垃圾桶,㷫到我吖!好在我係外人,如果我喺呢度嘅咪俾你恰?」
鎮宇最不滿意是無綫經常覺得找藝人拍劇是益了對方:「我同你哋拍劇係畀面你,唔係益我promote我,佢哋成日覺得係益咗人哋,賣一次廣告幾十萬,我畀你日日出街你就賺成幾千萬,但佢哋唔諗我幫佢哋賺咗幾千萬!又唔係畀得錢多,真係好𤷪。」
君如又批評電視台編劇水準下降,如袁詠儀和苗僑偉主演的《疑情別戀》對白似廣播劇,而《甜》劇前晚一場馬國明向徐子珊示愛場面,更假到離譜,她說:「𠵱家啲編劇點編㗎,做嗰個又假,場戲又假,又唔新鮮又唔浪漫!」
撰文:林妃

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載