› 選擇地區
三藩市
紐約
洛杉磯
其他美國地區
香港 台灣 北美
 
2008年08月02日

「將快樂建築喺人哋痛苦上」
Hit人榜:嘉良鬧鎮宇爆料為杏兒出頭

嘉良稱讚師妹杏兒勤力又用心,但提點她演戲勿用力過度,令屢受批評的她茅塞頓開。 攝影:林德雄

羅嘉良回巢主演的無綫新劇《當狗愛上貓》,上周首播平均收視29點獲182萬人捧場,成績不俗。吳鎮宇不知攞景還是贈興,早前自爆有女藝員向他哭訴拍戲靠關係而非靠演技,令劇中女角胡杏兒驟成嫌疑犯。
倒是杏兒反應淡然,鎮宇踩一腳加網民繼續狂插演戲浮誇,她懶理,「唔可以要所有人都鍾意你」。嘉良充任苦海明燈,直言她演戲勤力弊在用錯力,但又為她抱不平,指鎮宇將自己的快樂建築在別人痛苦身上,反不及杏兒包容,勇於面對各類惡搞批評。 撰文:朱倬誼

羅嘉良和胡杏兒在六年內三度合作,先後合演劇集《流金歲月》、《婚姻乏術》及播映中的《當狗愛上貓》,二人由《流金》兄妹變《貓狗》戀人。
六年人事幾番新,杏兒由昔日黃毛丫頭躍升花旦,但自從她在《亂世佳人》及《太極》中兩扮喊包,經常五官扭曲演繹慘情戲後,網民即群起惡搞,對她演技批評多多,甚至將她與「哭相怪石」相提並論,實在有點慘情,杏兒卻說:「喊係咁嘅樣,唔通仲好靚咩?佢哋有邊個唔『隊』?個個都『隊』㗎啦,冇法㗎,又唔代表全香港嘅人,唔可以要所有人都鍾意你。」

論演技 拿揑不準過咗火

這天杏兒和嘉良一起接受本報專訪,對於杏兒這位小師妹的演技,身為師兄兼三屆視帝的嘉良衷心直言,評價有彈有讚。

羅:羅嘉良 胡:胡杏兒
羅:做演員最緊要用心去演,年月之後,人哋會有評價,你到底有冇努力過,人哋係會知道。再合作嘅杏兒,同以往一樣都係咁勤力、咁努力,進步咗好多,但佢演戲有啲所謂嘅錯誤,係我哋以往都有犯嘅,就係用力嘅問題。有時會用多咗力、用錯咗力,你act戲時會睇到啲情緒、呢場戲好似特別「做」咗啲,以前都有導演同我講過,重要嘅戲係唔會有事,通常係閒聊、喺走廊行過嘅過場戲有問題,但呢啲戲永遠有上文下理接番狀態,所以好容易喺過場戲中嘅情緒拿揑得冇咁準確。
胡:我諗要好打醒十二分精神,要對分場好清楚,因為成日都跳拍……
羅:我覺得杏兒已經好好,佢好想做好、好用心去演,呢個出發點最重要。有啲嘢見仁見智,有時撞吓板係好。
胡:其實再同嘉良合作有壓力,期望喺佢眼中嘅自己有進步,唔係我會覺得自己好失敗。

讚大方 願包容網上批評

杏兒視嘉良如大哥哥看待,反而與她合作過《衝上雲霄》的吳鎮宇,早前在電台節目中指現今新人不懂演戲,更忽爆當年拍《衝》劇時,有同劇女演員向他哭訴拍劇靠關係不靠演技。講到這話題,杏兒未開口,嘉良已為她抱不平。
羅:鎮宇好有性格,會不經意將自己嘅快樂建築喺人哋痛苦身上,我都明白佢嘅,大家咁熟,哈哈!我覺得杏兒係個好堅強嘅人,而每個人都有過程,正如鎮宇話齋,有好多新人演戲唔好,但我哋以前都經歷過新人,只不過以前(資訊)冇咁發達,𠵱家會有好多網上聲音,大家應該用包容態度去睇,因為有時個劇同角色成唔成功包含好多因素,運氣都係一種。
我記得周潤發講過,演員一定要遇到好劇本,否則曉飛都冇用。每個演員都有成長過程,杏兒願意面對唔同聲音去檢討、去接納,掉番轉佢都包容緊一啲人,可能有啲好攻擊嘅嘢,但唔緊要,始終做人修為都係自己嘅,好多嘢好快過,最緊要用心做過。
胡:同埋演員好被動,公司畀你做唔通唔做咩?都冇得選擇。

教冧廠 病假係演員福利

羅:杏兒𠵱家演戲成熟咗好多啦,拍《流金》時,我覺得佢已經對演戲好有信心,可能佢個心好騰未定啦。
胡:當時係冇壓力,乜都唔識,返工好似去玩咁,所以覺得好似好有信心。我好驚自己做得唔好,我好記得有一日要拍一大段戲,要跳拍好多唔同嘅情緒,其實好難,嗰時自己又踩緊另一套《鄭板橋》,時裝、古裝係咁跳嚟跳去,我好記得係你教我冧嘅。
羅:吓?係咩?幾時呀?
胡:你話一個演員做得好唔好,唔係只係睇有幾勤力。你好攰會做得唔好,唔係攞勤工獎,日日返晒工叫做好吖嘛。
羅:你見到有啲演員就死咁,不如返去瞓啦,頂嚟做乜吖?呢樣係演員福利,做乜唔要呢?以前我拍戲,入行後起碼6、7年先第一次冧。之前個個讚,撈家鐵人嚟㗎,勁呀!我後尾做做吓覺得個理論唔係好啱,自己身體狀況唔得喎,人會病、會攰。我覺得公司會體諒,當然我哋要喺合理情況下休息,亂咁冧當然唔啱。

化妝:Zoe(胡杏兒)
髮型:KeiofHH(胡杏兒)、AndyLeungofHairCulture(羅嘉良)
服裝:DKNYJEANS
場地:FatAngelo'sofTST

搶爆結局:嘉良癌病死 杏兒哭斷腸

播映中的《當狗愛上貓》,表面上賣寵物、是輕鬆愛情小品,但實情是悲劇。羅嘉良最後因癌症死去,胡杏兒則攬小貓CanCan和愛犬小巴痛哭,在尾聲大放催淚彈。
拍攝《當》劇時,正值嘉良與前妻方敏宜分居,杏兒表示當時嘉良的情緒沒異樣,嘉良就說:「演戲同私人分開嘅,情緒都OK。」他說演繹的角色苗隼有點複雜:「苗隼背負好多嘢,女朋友俾車車死,老竇爛滾離開屋企,阿媽又唔認個仔,形成佢嘅孤獨性格,係遇到杏兒之後,佢諗盡辦法令苗隼順和啲,但苗隼係個好感性嘅人。」私底下嘉良結束10年婚姻生活,他還有個9歲囝囝羅裕王成,難道他又可以放得低?他說:「我之前要講嘅嘢已經講晒,私人事唔會再回應。」
今次令嘉良難忘的是拍劇尾期,他說:「因為講我癌病復發,就死時有好多感覺,令人好想喊,監製、導演都話好感人。其實呢套戲係悲劇,全靠貓狗搶收視,最紅咪小巴囉。」

幻想狗吠罵人

杏兒則說:「有場戲講我以為撈家死咗,我要講畀貓狗聽,等佢哋死心,我要坐喺度讀成兩、三頁對白,貓狗坐我身邊,我又要有情緒,但一take過,呢場都幾難忘,佢哋好乖,好似聽我講story咁,最後我攬住小巴,小巴舔我啲眼淚。狗不嬲多情緒,貓會cool啲,所以嘉良咪隻貓,我咪隻狗,好似戲入面我鬧嘉良,我都會幻想自己係隻狗喺度吠㗎。」

寵物情緣:小巴好戲唔憂做 CanCan肥瘦分身

嘉良和杏兒是《當狗愛上貓》的男女主角,但劇中的唐狗仔小巴和英國短毛貓女CanCan的戲份也甚多,其實牠們同是反串上陣,小巴是狗女,CanCan是貓仔。
小巴早於去年出道,由工作人員買牠回來演出《奸人堅》,當時牠兩個月大,角色叫「豬豬」,常與楊秀惠和黃子華演對手戲。拍完後,小巴放在TVB,依慣例由人事部出通告「拍賣」,由職藝員出價競投,未幾監製關永忠籌拍《當》劇,他對小巴一見鍾情,馬上買了牠及送往元朗狗場訓練。
至於CanCan則由狗場代為揀蟀,原來劇中有兩頭CanCan,一隻較肥、一隻較瘦,分別拍文戲及動作戲。

貓狗日日約會

兩隻CanCan同樣被安排放在狗場中獨立飼養,但兩貓和小巴每日都會在草地上相對兩小時,共處一個月變friend後才正式拍攝。如今兩貓已由無綫職員收養,小巴就返元朗狗場。由於小巴超好戲,所以繼續狗明星生涯,據知牠會演出《烈火雄心III》,稍後更會在另一部講狗的時裝新劇中擔演第二狗主角。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載