蘋果日報 | APPLE DAILY
› 選擇地區
三藩市
紐約
洛杉磯
其他美國地區
2008年12月24日

重看陳年《YES!》 毒瘤成笑談
劉錫明驚爆 周慧敏深夜道歉

劉錫明昨日拿着92年3月出版的《YES!》,「毒瘤明」舉目皆是,他淡然一笑。該期雜誌出版之時,他已不敢跟周慧敏來往。
攝影:葉君海

闊別香港14年,劉錫明還是那個劉錫明。沒有中年發福,只是眉宇間有點滄桑,幸好,身上冇「毒瘤」。本是無綫力捧小生,因倪震洗腦式的「毒瘤明」攻勢弄得無立足之地,14年來中港台三地飄泊。大家都以為事件源自兩男一女爭風呷醋式抹黑,原來倪才子所做一切,只為提高《YES!》銷量。劉錫明昨日接受本報專訪時更直認,周慧敏一早知情,更曾深夜致電向他道歉。倪震自詡辦過香港最暢銷雜誌,當年被他踩到盡的劉錫明,應記一功。

相關新聞:珍惜太太發誓唔滾

劉錫明17年前因為一句欣賞周慧敏(Vivian),遭倪震口誅筆伐,在他自詡為「最暢銷雜誌」《YES!》中冠之以「毒瘤明」惡名,越鬧越好賣,最後迫得劉錫明離開香港,轉攻台灣,變成一棵「無根草」。但原來內裏還有故事。

劉:劉錫明 記:記者

記:倪震日前向你道歉,你話已經接受咗,但係咪真係釋懷?
劉:釋懷咗好耐,反而媽咪仲好嬲,可能因為我係孻仔,佢好錫我。噚晚(即前晚)我同媽咪食飯,勸佢唔好再嬲,佢就話:「𠵱家先嚟道歉?都十幾年啦,𠵱家道歉有乜嘢用?」

倪震谷書
周慧敏:勸極唔聽

記:其實當年件事係點?
劉:由91年開始,我已經冇同Vivian聯絡,真係驚咗。唔記得係93年底定94年頭,有一晚,11點幾,Vivian打畀我,同我道歉,話唔好意思,佢話:「我知道發生乜嘢事,我知道佢咁樣寫你係唔關三角關係事,而係寫完之後本書好賣得,所以繼續寫。我有勸過佢(倪震),但佢唔聽。」我就話:「唔寫都寫咗囉,算啦,你再勸下佢,叫佢唔好再寫啦。」
記:之後你就去台灣?
劉:94年我同TVB約滿,我覺得留喺香港都冇發展,吳麗珠介紹咗台灣製作人王長麗畀我識,我就簽咗佢,去台灣拍劇、出唱片。95年識咗我太太,01年結婚。91至93年,我經歷人生低潮,點知去到台灣竟然絕處逢生。
劉:00年民進黨上台,太太就勸我去內地發展,但當時遇到好大困難,我惟有靠自己克服、慳啲使。當時媽咪喺香港,太太喺台灣,咁多年就係中港台飛嚟飛去。01年我拍咗部劇集《新一支梅》,02年喺內地播,終於打開知名度,喺內地每個月都有登台騷,仲有唱片公司簽我。𠵱家嘅生活,都夠餬口。
記:囡囡02年出世,令你有乜嘢改變?
劉:個女出世之後,我發覺自己變咗好多,眼神都柔和咗。忽然覺得,我有個幸福嘅家庭,有三個哥哥一個妹妹喺香港睇住媽咪,已經好滿足,喺嗰刻開始我真正原諒咗佢(倪震)。
記:滿意𠵱家嘅發展嗎?
劉:因為我比其他人早去內地發展,識咗好多製作人,又簽埋內地經理人,出年我仲會做埋製作,拍一部劇集,搵老闆投資。我唔係叻人,又唔係要做天王,總之唔強求,賺到錢夠養屋企人就已經好滿足。

相關新聞:聞倪震已婚 疑似網誌發功張茆:我快崩潰了

想返娘家
拍無綫劇隨遇而安

記:有網民要求無綫搵你返去拍劇,你有冇興趣?
劉:TVB係我娘家,如果可以返到去係好事,不過經濟咁樣,唔係話想返就返到,總之隨遇而安,唔強求喇。
記:人人都叫倪震做「毒瘤震」,係咪有少少心凉?
劉:唔會。己所不欲,勿施於人,當年我試過俾人叫呢個名,好明白呢種痛苦,都唔想其他人承受。雖然大家都話係報應,佢(倪震)都話係,但我唔認為將痛苦加喺人身上係一件快樂嘅事。希望大家放佢一馬,畀條路佢行。𠵱家佢哋修成正果結婚,呢個係佢哋嘅決定,唔需要咬住唔放。
採訪:陳月媚 撰文:吳佩思

小八卦:「我回來了」一語成讖

劉錫明17年前讚過周慧敏一句,其情敵倪震即在旗下《YES!》雜誌,用「毒瘤明」惡號不斷抹黑他。劉錫明昨日接受本報訪問時,翻看本報記者千辛萬苦找來、92年出版、內有「毒瘤明」報道的《YES!》雜誌,他反應很大:「吓,咁你哋都搵到呀!」劉錫明翻看期間神態自若,但冷不防揭中標題為「我回來了」的周慧敏專訪,禁不住笑了出來,有意留港發展的他更說:「哇,乜咁啱,呢個世界真係咁啱得咁蹺嘅!」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載