蘋果日報 | APPLE DAILY
› 選擇地區
三藩市
紐約
洛杉磯
其他美國地區
2009年03月14日

準金像影帝張家輝爭爛片王
第4屆金話梅公佈提名

張家輝

由《蘋果》娛樂版舉辦嘅「金話梅電影選舉」(GoldenPlum)不知不覺已經嚟到第四屆,本報娛樂版呼籲電影人向爛片「sayno」,但今年依然有不少爛片出品。上年做金話梅影后嘅孟瑤,今年仲憑《有隻僵屍暗戀你》同《我老婆係賭聖》獲雙提名,至於憑《証人》提名香港電影金像獎影帝嘅張家輝,又憑《我老婆係賭聖》角逐金話梅影帝。讀者可於今日起喺壹蘋果網絡內投票選出心水爛片。
撰文:蘇芬妮

◢最爛男主角提名
張家輝《我老婆係賭聖》

張家輝戲入面個名叫周姐輪係幾搞笑,但又扮番老實人,悶唔悶啲?難得佢拍完套戲都預咗入圍金話梅,一個唔覺意攞咗金像獎影帝加金話梅影帝,仲唔威到盡?

黃宗澤《大四喜》

黃宗澤處子登場就奉獻咗畀套爛片,成個花o靚樣要勸人戒賭,已經冇乜說服力,加上演技生硬,惟有靠賣肉搶鏡。

郭晉安《有隻僵屍暗戀你》

堂堂視帝淪落拍爛片,郭晉安同夏雨並駕齊驅。最慘係安仔飾演嘅警察好似冇點畀過心機去演,同中學生謝師宴嘅例行表演冇乜分別。

金城武《赤壁》

我唔mind由靚仔扮諸葛亮,但可唔可以唔好搞爛gag先?金城武扮嘅諸葛亮太潮啦,睇到人好唔習慣。

方力申《我的最愛》

方力申破格扮演姑爺仔無任歡迎,不過唔似都冇計,佢都係演番情聖算罷,睇見佢臨尾喺街頭俾人打嘅話,fans會傷心o架。

◢最爛場面提名
《助念新星》衣櫃藏姦夫

李賽鳳同契仔宗天意呢壇疑似不倫戀鬧上娛樂頭條,人人竊笑,導演居然將呢幕照辦煮碗搬上銀幕,真係該煨!

《我老婆係賭聖》霸王硬出浴

孟瑤無端端着白恤衫衝入浴室搵張家輝,搞到淋濕透點,牽強程度直逼布殊出兵攻打伊拉克。不過諗番轉頭,孟瑤出浴戲應該係賣點嚟喎。

《無野之城》全裸更衣室

電影一開始就見成班麻甩佬喺更衣室冲凉,刀光劍影冇遮冇掩。打完波冲凉,好理所當然,問題係呢幕完全同劇情無關,問你死未?

《赤壁》白鴿當簽名

「放白鴿意境有幾高?好抽象喎!」《赤壁》末段成分鐘用白鴿主觀鏡飽覽曹軍水師氣勢,好似吳大導拍完套戲要簽番個名一樣。

《內衣少女》安全性行為

王祖藍向Stephy示範安全性行為──你有你做,我有我叫,然後自動波發出劏豬叫床聲,王祖藍仲要扮興奮加七情上面,好難唔凳。

◢最爛導演/電影提名
錢江漢《有隻僵屍暗戀你》

呢套電影好高,因為好難搵到佢嘅主題,殭屍片冇驚嚇殭屍,愛情位拍唔出愛情味,成班戇男儍女困獸鬥對抗殭屍,完咗都唔知完。

鄧德榮《助念新星》

助念,應該講禪啩,不過全片兩個鐘頭內,除咗片尾講吓佛偈,大部份時間淨係見到張國強發老脾,怨氣冲天,令人無明火起。

林子聰《大四喜》

全片橋段似抄舊片,灑痕粉、大力膠冲凉、食過期春藥、錯摸私生子等,全部見慣見熟,《大四喜》係咪抄盡東西南北嘅意思?

雲翔、劉國昌《無野之城》

以半紀錄片形式講述香港棒球隊嘅事迹,但片中無厘頭加插唔關劇情嘅大量男性裸露場面,睇極都唔明。

葉念琛《絕代双嬌》

故事實在太爛啦,呢個年代仲玩身份交換嘅橋,仲要係Stephy同Kary,唔該晒!最嘔血係成套戲狂擦廣告商鞋,睇到人。

◢最爛女主角提名
孟瑤《有隻僵屍暗戀你》

孟瑤嘅演出可以用七個字形容—「由頭到尾棟篤企」,既冇內心戲、又少露肉戲,行屍走肉一樣。

孟瑤《我老婆係賭聖》

今趟扮賭聖嘅孟瑤,拍打戲身手唔掂、扮賭聖手勢生硬、扮失憶似智障、扮純情卻見野性,仲要成日擔住支珍寶珠,到底搞乜嘢?

李賽鳳《助念新星》

久疏戰陣嘅李賽鳳玩素顏上鏡,加插對契仔宗天意嘅露骨纏綿對白,眼睛與耳朵齊齊受罪。其實佢同宗天意嘅關係,whocares?(註:宗天意幾好戲)

江若琳《嚇死你》

電影一啲都唔驚嚇,江若琳嘅演技先至嚇得死你。驚樣只係得一個,就係擘大口大叫,我寧願睇番佢個choke樣。

黃翠如《奪標》

黃翠如嘅演技可能未必有人會留意,但睇完佢喺呢套戲嘅誇張演出同表情,應該開始會多人講。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載