蘋果日報 | APPLE DAILY
› 選擇地區
三藩市
紐約
洛杉磯
其他美國地區
2009年03月22日

男生圍:草蜢十人談

草蜢三子(左起)蘇志威、蔡一傑和蔡一智在娛樂圈打滾多年,外形改變不大,只是隨着歲月燃燒增添成熟味道。攝影:林德雄

草蜢近年逢開騷例必出現撲飛潮,如舉行沒有毒品沒有酒精的raveparty,觀眾情緒高漲企足全場。下月,草蜢在紅館開騷,因反應熱烈而三度加場,共開7場。
回想1985年,蔡一智、蔡一傑和蘇志威膽粗粗用了自己填上廣東詞的日本歌曲參加新秀,晉身樂壇;轉瞬24年,昔日的草蜢仔已進化成草蜢佬,明年更邁向銀禧紀念。他們坦言除了自己努力奮鬥,也慶幸音樂旅途中遇上10位伯樂,除了恩師梅艷芳,還有陳百強、鍾鎮濤和張衞健等患難之交,三子感嘆:「入行咁耐,我哋賺錢唔算多,但賺到一班好朋友,夫復何求!」 撰文:王連連

1)梅艷芳樂壇恩師

草蜢入行前,用隊名以諸葛神算卜卦,得出詩句如下:「若遇草頭人,咫尺青雲路。」信不信由你,他們第一個恩師便是梅艷芳。作為首席弟子,對梅姐太多難忘的回憶。
蘇志威說:「佢為咗培育我哋,三年要我哋跟佢去做巡迴,見識多啲。有一年,佢連續喺海洋皇宮唱15晚騷,有一晚阿梅病到面青,又屙又嘔,腳軟起唔到身,我哋一直喺後台扶住佢,當時搞手張耀榮都話可以唔唱,但佢唔想人哋買咗飛要走,撐住要唱。一出場佢好似條龍咁好精神,但係一落番台就差啲暈低要抬佢走。佢教我哋,就算喺台下係一條蟲,但喺台上一定係條龍。」

2)陳淑芬草頭貴人

又一個草頭人!陳淑芬算是草蜢重要的背後女人,是他們第一任經理人,草蜢笑言當她是財神爺。
蔡一智說:「佢係我哋貴人,95年第一次演唱會係佢邀請我哋做,當時做咗10年都未有人夠膽搵我哋。呢個演唱會係草蜢嘅轉捩點,令我哋事業跨進一大步,而且嗰陣唔係好多人可以打入內地市場,但十幾年前已經幫我哋做內地巡迴,走咗20幾個省,做足兩、三個月。
「佢係女強人,有次我哋去台灣做騷,嗰個主辦單位仲未搞掂啲嘢,陳太堅持要佢搞掂晒,我哋先上台。不過嗰陣佢冇講乜嘢事,淨係叫我哋化好妝,收到佢電話先上台,佢幫我哋爭取、堅持到最後一刻。佢幫我哋排除好多困難,唔會令藝人擔心,可以專心表演。」

3)陳百強儍氣偶像

陳百強是草蜢中學時的超級偶像,三子很留意其動向,又買他的唱片,趁乘船空檔背歌詞,又會模仿偶像的衣着,例如阿智會學他拿着網球袋上學,蔡一傑就拿着滾軸溜冰鞋上街。
蔡一傑說:「入咗行之後,有次跟住阿梅做《星光熠熠耀保良》,喺房見到佢超級興奮,當時識鬼講嘢咩,梗係即刻影合照啦,後尾仲做埋朋友。佢經常表演完就問我哋:『點呀?我型唔型呀?』佢好鍾意跳完幾個舞步、擺個甫士唔郁,擰個頭望住我哋笑,佢好可愛又好儍氣。同埋佢好錫後輩,我哋第一次歌迷聚會搵佢做嘉賓,估唔到佢冇嫌個場地細,冇嫌我哋唔紅,一口應承,仲拎住束花出場送畀我哋,永世難忘佢咁幫忙。」
蔡一智說:「我哋遇到困難,包括感情事,都會同佢傾訴,佢會同我哋分憂。」

4)張智霖心理醫生

92年草蜢因拍無綫劇集《冲天小子》結識張智霖,大家志趣相投,加上他性格開朗,令本來內向的蔡一智告別憂鬱。
蔡一智說:「佢話我哋成日睇嘢睇得好嚴重,覺得我哋太認真,佢經常話面對乜嘢都要輕鬆啲,慢慢被佢感染咗。我哋第一套劇《冲天小子》同佢一齊拍,大家同甘共苦,經歷過好多。當年我媽媽離世,嗰日我哋啱啱收工,個心又急又亂,佢車我去醫院,仲冒險衝咗好多盞紅燈。」
蘇志威說:「我哋相處好舒服,感情好好。佢個人好冇所謂,又好開朗,每次有佢喺度,就會特別開心。」

5)周潤發奪第一次

對一個剛入娛樂圈的人,見到巨星自然特別興奮,草蜢從周潤發手上領取首個樂壇頒獎禮的新人獎項。事隔多年,即使草蜢多次冧莊奪得組合獎,那個第一次仍然難忘。
蔡一傑說:「我哋拎第一個新人獎,就係由佢手上拎到,發哥出場,全場觀眾熱情澎湃。喺佢手上接個獎,會有更強烈嘅使命感,覺得做嘢嘅時候要更畀心機。」

6)林氏家族幕後軍師

(林珊珊、林海峰及林曉峰)
林珊珊是草蜢的第二任經理人,入行時珊珊做DJ,四人由工作開始建立友誼;林海峰則是求學時代與蔡一傑在的士高結識。入行後,阿智更曾與Jan合資開設計公司。
蔡一智說:「我哋有乜嘢大型表演,林氏家族包括佢哋爹哋媽咪都嚟捧場支持。珊珊係我嘅精神支柱,傑仔永遠拉住佢講心事,我又會捉佢入房商量好多嘢,慢慢建立感情。我哋睇住佢啲女大,家過時過節,就算珊珊唔在場,我哋都會同佢啲女一齊去玩。
「林海峰就係我哋嘅幕後軍師,如果有大project搞都會問佢意見,之前『We』同埋『Forever』演唱會,佢幫我哋度講啲乜嘢;林曉峰通常就幫我哋嘅活動做司儀,夾埋佢哋嘅老婆仔女,我哋個family好似溝埋林氏家族,好大班人。」

7)張衞健首位伯樂

草蜢獲阿梅賞識前,原來已被張衞健(Dicky)睇中,邀請他們伴舞。
蔡一傑說:「其實第一個欣賞草蜢嘅人唔係阿梅,係Dicky。佢見到我哋嗰屆有隊少年組合,而且當年又興日本風,所以搵我哋幫佢伴舞,第一次係同佢喺伊館做港台騷,仲夾埋Dicky一齊着『蛤乸衣』。」

8)倫永亮創作導師

草蜢以日本歌配廣東詞,改歌名為《一起衝》參加新秀,其後蔡一智被倫永亮帶領加入創作行列,令他信心大增。蔡一智說:「倫永亮係我入行後最欣賞嘅音樂人,大概86至87年,佢鼓勵我作曲,仲同我講:『就算冇學過正統樂理都可以創作。』之後我哼一首歌,得純melody,去佢屋企畀佢聽,佢幫我伴奏,做咗一隻demo出嚟,佢聽完首歌話notbad,畀咗好大信心我。」

9)劉培基社交達人

草蜢因阿梅與劉培基(右圖)是多年合作夥伴,與他相識至今20多年,三子接受訪問時,還帶了劉培基設計的歌衫(左圖)到場。
蘇志威說:「喺草蜢成長路上,佢影響好多,平時我哋搞party,通常一班熟朋友會坐埋一齊玩,但係劉培基唔會咁樣,佢會編排座位,佢話坐你哋隔籬嘅人一定唔會係你哋朋友,一定係我嘅朋友,佢想我哋接觸多啲唔同層面嘅人,眼界自然闊好多。佢幫我哋設計好多衫,睇番以前嘅歌衫,到家仍然覺得咁靚咁sharp。最重要係佢嘅做人態度,佢講過如果自己有能力,盡量自己做番所有嘢,唔好欠人哋人情。」

10)鍾鎮濤有禮前輩

草蜢拜師阿梅前,三子獲鍾鎮濤(B哥哥)賞識邀請伴舞。到今天,B哥哥仍是他們尊敬的前輩之一。蔡一傑說:「新秀之後,有個公開活動見到B哥哥,佢話我哋三個好得意,係幾有衝勁嘅年輕人,仲搵我哋幫佢伴舞。佢好有風度,又有禮貌,出活動前,會帶我哋去佐敦恒豐中心IceFire買衫,仲幫我哋揀埋。」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載